Hunermendo kurd Seîd Yusifo ke 26ê sibate de Nêweşxaneyê Fakulteyê Çapa Tipî yê  Îstanbulî de wefat kerd cenazaya ci badê berdişê Başûrê Kurdîstanî Bêrê Sinîro yê Sêmalka ra ameyî ardene Rojawan. Cenazaya Yusifî hetê Yewîya Roşnvîranê Rojawan, temsîlkaranê Îdareyê Xoserî û bi seyan hemwelatijan ra ameyî girewtene û goristanê taxa Qudurbegî de ameye dedinkerdene.

Seîd Yusifo ke serra 1937î de bajarê Qamişloyî yê Rojawanî de ameyo dinya 50 serrî yo hem bi saz hem zî bi vatişê xo  xizmetê muzîkê kurdî keno. Yusifo ke sey "Mîrê tembûrî" yeno zanayene  deyîra ci ya ke tewr zaf yena zanayene  “Oy felek”a. Reynda deyîrê sey "Ez nikarim rabim", "Qamişlo bajarê evînê" û  "Nêrgiz" zî û xeylêk deyîrê ci yê bînî zî hetê hunermandanê kurdan ê perçeyanê bînan ra ameyî vatene.

Yusifo ke hunermendanê namdaranê kurdan ra yo  26ê sibate de Nêweşxaneyê Fakulteyê Çapa Tipî yê  Îstanbulî ke nêweşîya rîşa merdimwere ra tedawî dîyêne de wefat kerdbi. Yusif Qamişlo yo ke tira vatêne, ''bajarê evînî'' de  ame definkerdene