Xeylê qezayanê şaristananê Vakurê Kurdîstanî de vera destsernayîşê îradeyê şarî çalakîyê cîya-cîyayî ameyî kerdene.

Wan de ciwanan taxanê Xaçort, Karşiyaka, Terzîoglu, Bostanci, Şabaniye û Gundogduyî de çalakîyê protestoyî kerdî, sloganê sey “Bijî Serok Apo”, “Bê Serok Jiyan Nabe”, “Bîjî Berxwedana Zindanan” û “Kurdistan wê ji faşîzmê re bibe goristan” berz kerdî. Polîsan hêrişê ciwanan kerd. Ciwanan bi kerra û fîşekan cewab da hêrişan. 

Êlih de Milîsanê Azadîya Kurdîstanî (MAK) taxanê Emeklî Tokî, Hîlal, Karşiyaka, Petrolkent, Baglar, Korike, Pazeryerî, Bayindir, Cûdî û Petrolî de barîkatî nayî ro, cewab da hêrişanê polîsanê tirkan. Ciwanan sloganan reyde adir vist ta. MAKî bi teqaberan û fîşekanê hewayî cewab da hêrişanê polîsan.

Qezaya Nisêbînî ya Mêrdînî de bi beşdarîya Wekîlanê DEM Partî Zekî Îrmez, Kamuran Tanhan û Hemşaredaranê Nisêbînî rayraşîyayîşê bi meşaleyan ame kerdene. Çalakîye de Kamuran Tanhanî dîyar kerd ke ê do qeyûman qetî qebul nêkerê û şaredarîyanê xo apey bigêrê.

Qezaya Artûkluyî ya Mêrdînî de serkêşîya TJA, Meclîsanê Cinîyan ê DEM Partî û DBPyî de darbeya qeyûman bi rayraşîyayîşêkî ameye protestokerdene. Wekîlê DEM Partî, Hemşaredara Mêrdînî devrîme Demîr û Mayê Haştîye zî tewrê çalakîye bîyî. Devrîme Demîra ke herinda ci de qeyûm ameyo tayînkerdene çalakîye de pare kerd ke şarê kurdî do ancî qeyûman bişawo û wayîrê îradeyê xo vejîyo. Hemvervatoxa DEM Partî Halîde Turkoglu zî bale ante tecrîdê Îmraliyî ser û vat ke bi xorinkerdişê tecrîdî polîtîkayê qeyûmî yenê caardene. Halîde vat ke ganî cade tecrîd wedarîyo.