Seba ke tecrîdo ke Rayberê Şarê Kurdî Abdullah Ocalanî ser yeno bicaardene, bêro wedartene û seba weşîye, ewlehîye û azadîya ey Nasir Yaxiz o ke 53 rojî yo bajarê Başûrê Kurdîstanî Hewlêr de kewto grevê vêşanîye hetê weşîye ra her ke şono beno xirab.
Endamê Meclîsê HDPyî Nasir Yaxiz 53 rojî yo Hewlêr de kewto grevê vêşanîye û weşîya ey her ke şona bena girane.
Grevê vêşanîye yê bêwext û bêdore yê Yaxizî kewt roja 53ine. Hetê bînî ra grubê ke bidore grevê vêşanîye domnenê û kesê ke yenê zîyaret zî her ke şonê benê zêde.
Nê rojanê peyênan de xeylî sîyasetmedar û hunermendê Başûrê Kurdîstanî ameyî zîyaretê Yaxizî û her çiqas ke rewşa xo bibo giran zî Yaxiz bi qerardarîye çalakîya xo domneno.
Yaxizî roja grevê xo yê 46ine yê 5ê Çile de beyanat dabi ANFyî û vatbi, heta ke netîce bêro girewtene ez do çalakîya xo dewam bika. Hêzê demokrasîyî ke bêrê têhet faşîzm bin keweno. Merdim ke nê hetî ra biewno ci grevê vêşanîye firsendêko tarîxî yo. Hende ke şar wayîr bivecîyo û paştîye bido ci. Rejimê Îmraliyî de dîmensîyonê mîyanwelatîyî estê û rejimêko teberê merdimahîye yo. Bê hiqûqê universalî, bi barbarîye yeno domnayene. Îmrali meydanê şerê îradeyê merdimê azadî û hovîtîye yo. Pêro hêzê mîyanwelatîyî şîrigê ney rejimê zordar û sucdarî yê. Hetê Birêz Ocalanî ra xoverdayîşêkoo tarîxî yeno dayene û ganî her kes paştîye bido ci û no tecrîd bêro şikitene.“
Yaxizî va: ‘‘Ganî bi şîarê “Şima nêeşkenê roja ma bikerê tarî” her kes vera faşîzmî bivindo. Heta ke Rayberê ma bibo azad ma do çalakîyanê xo bidomnê. Pêroyê Şarê Kurdîstanî ganî bi ney zanayîşî hereket bikero.‘‘
