Parlamenterê HDPyî Huseyîn Kaçmazî vist vîr ke Ocalan 19 serrî yo binê tecrîdêko sîstematîk de yeno tepiştene û no zî îxlalkerdişê peroyê heqanê esasî yo û vera huqûqo evrensel de zî suc o.

Rayberê Şarê Kurdî Abdullah Ocalan 19 serrî yo Îmrali de binê tecrîdî de yeno tepiştene. 27ê temuza 2011î ra nata avûkatanê ey, 11ê êlula 2016î ra nata zî merdimê ci nêşkenî ey bivînî. Heyetê Îmrali ke wextê muzakereyan de dîyayîşî vireştêne, ê zî 5ê nîsane 2015î ra nata nêşkenê şorî Îmrali. Dezgeyê mîyanneteweyî sey Komîteya Vernîgirewtişê Îşkenceyan (CPT) zî wezîfeyê xo nêanî ca û şar vera înan de reaksîyonin o.

Parlamenterê HDPyî yê Şirnexî Huseyîn Kaçmazî tecrîdo ke bi serra no rameno, ser o qisey kerd. Kaçmazî dîyar kerd ke 11ê êlula 2016î ra nata tecrîd hîna xorîn bîyo û wina domna: “Çiyê ke Îmrali de benî, cayê ci dewleta huqûqî de çin o. Xora huqûqê mîyanneteweyî de na neheqîye nîna qebûl kerdene. Tecrîdê Îmrali heme heqanê merdimî û huqûqî gêno binê lingan.”

Kaçmazî eleqe ant ser muhîmîya rolê Ocalanî ser û wina va: “No dewro ke Tirkîya û Rojhelatê Mîyanênî de kaos esto, tecrîdê ser Ocalanî nê kaosî hîna xorîn keno. Peroyê qeydê demokrasî û huqûqî yenê îxlal kerdene û vera huqûqo evrensel de zî suc yeno kerdene. Ancax bi felsefeya Ocalanî kaos qedîyeno. No semed ra wazenê ke tecrîdo girankerde dewam bikero.”