Endamê Komîteya Caardişî ya PKKyî Duran Kalkan bi meymanê programê Dilistanî yê radyoya Dengê Welatî û cewab da persanê rojnameger Ciwan Tunçî.

Kalkanî da zanayene ke ganî sîstemo ke Kurdîstanî ser o yeno ferz kerdene, baş bêro fam kerdene û va ‘no qirkerdişo ke armenî û asûrîyan rê ame kerdene ra zêdeyêr, erzeno mîyanê tengîyan o’. Kalkanî vatişê Rayberê Şarê Kurdî Abdullah Ocalanî da vîr û wina va: “Wexto ke kurdî seba azadîya xo çîyêk kenî, şîrigê dagîrkeran yewbînan sucdar kenî. Helbuk Kurdîstan de 40 serrî yo ke şerêk esto. Nê şerî herêmanê bînan ser o zî tesîr kerdo. Erdogan Milletê Yewbîyayeyî de vano ‘bi destek û tesdîqê Amerîka aver şi’. Çi eleqeyê xo esto? Sîstemêko winasî awan kerdî ke ganî kurd qala çîyêk nêkero, hetta ganî kurd qet çinêbo.”

ZÎHNÎYETÊ ÎTTÎHAT TERAKKÎ

Kalkanî Erdogan ra va ‘gelo ti do bibî Neron û dinya biveşnî?’ û bale ant vatişê ‘ma do rojhelatê Firatî zî pak bikerî,’ yê Erdoganî ser. Kalkanî wina va: “Erdogan qiseykerdişê xo de vano ‘ê cayî wexto ke destê DAÎŞî de bî, rewşa înan hîna baş bî’ û bi no hawa îtîraf keno ke o zî endamê DAÎŞî yo. Wa dinya pêro bizano; Erdogan endamê El Kaîde yo û Îxwan-i Muslîmî yo. Yê ke tira OSO û El Nusra yeno vatene El Kaîde bi xo yo. El Kaîdeya Sûrîye zî El Nusra ya. Erdogan dîyar keno ke ê cayî bêewle yî û ti kes nêşêno bicuyo. Helbuk 4-5 mîlyon merdimî ewja de cuyenî. Goreyê Erdoganî ganî tena o bimano. No zîhnîyetê Îttîhat Terakkî yo.”

Ê VER BI RIJÎYAYÎŞÎ DE YÎ

Kalkanî da zanayene ke dîqet bikerê; xeylê derbeyan weno û ver bi rijîyayîşî de yo û wina va: “Eke xoverdayîş bêro zêde kerdene û şerêko raşt bibo, zîhnîyet û sîyasetê ci do birijîyî. Gerîlayî bîyî hêvîya merdimîye. Hêzo ke pey gerîlayan de yo, îdeolojîyê Rayber Apoyî yo. Rayber Apoyî va ‘ez merdimîye de israr kena’. No her roje hîna baş yeno fam kerdene. Kemal Pîrî zî vatbi ‘Ma qaso ke oxirê ci de bimirî, cuye ra hes kenî’. Xora bi sewbîna çî no têkoşîn dewam nêkerdêne.”

TIRKÎYA BÎYA ZÎNDAN

Kalkanî qala rewşa hepsîyanê şorişgêran zî kerd û wina va: “Erdogan bi hemkarîya Bahçelîyî Tirkîya kerdo zîndanêko akerde. Dîlok ra pey dêsî ameyî ronayene û sey zîndanan têlê teluyinî ameyî bestene. Nika zî sînorê Tirkîya û Îranî ser o dêsî yenî viraştene. Erdogan hewl dano bi no hawa dîktatorîya xo bidomno. Erdogan xo sey muxtarê Tirkîya hesibneno, labelê raştîya xo de gardîyanê Tirkîya yo.”

24 SAETAN XOVERDAYÎŞ

Kalkanî qiseykerdişê xo de qala têkoşîno ke bêro dayene kerd û wina va: “Çîyêk bêtêkoşîn nîno qezenç kerdene. Cok ra ganî hem zîndan de û hem zî teber de 24 saetan xoverdayîş bêro nîşan dayene. Heme çîyî ra vera ganî merdim raşt fam bikero. Çimkî raşt fam kerdene xoverdayîşêk o. Reyna bi îradeya xo şer kerdene û cuyayene zî xoverdayîş î. Têkoşîn de çalakîya gird-şenike yan zî baş-nebaş çin a. Kura de çi lazim bo, ganî bêro kerdene.”

Kalkanî peynîya qiseykerdişê xo de vatişê Ocalanî yê ‘Gerîlaya/o ezîz zerrî û mezgê xo pêt bitepişe’ da vîr û va ‘no vatiş seba heme şorişgêran derbazdar o’.