Hemserekîya Konseya Rayberdişî ya KCKyî seba bi vîrardişê Seyîd Riza û embazanê ci yê ke 15ê Teşrîna peyêne de ameybî îdamkerdene eşkerayîyêka nuştekîye daye.

KCKyî vat: “Nê îdamî sey sembolê qirkerdişê Dêrsimî ameyê bicaardene. Waşto ke vajê êyê ke nasname, ziwan û kulturê xo ca nêverdanê û nêbenê tirk peynîya înan îdam o. Nê îdamî seba pelexnayîş û bêvengkerdişê Dêrsimijan ameyê bicaardene. Vatê kesê ke nêbenê medenî yanî kesê ke nêbenê tirk heqê înan ê ciwîyayîşî çino.”

DÊRSIM BI TEMAMÎ QIRKERDIŞÊK O

KCKyî eşkerayîya xo de bale ante nînan: “Bi xeylî dokumananê ke aîdê verê serra 1937î yê ameyo îspatkerdene ke qirkerdişê Dêrsimî biplan ameyo bicaardene. Vêşnayîşê pirdêk sey bahaneyê serewedartişî ercnayîş ramojneno ke plan zaf verî ra ameyo hadrekerdene. Qirkerdişî de cinî, doman, ciwan û kokim bi des hezaran kesî ameyî kiştene, bi des hezaran zî ameyî sirgûnkerdene. Xorînî û tesîrê şiwareyanê ke şarê Dêrsimî dimayê 1938î ra vatê bi temamî qirkerdişî ramojnenê. Eke biheq no qirkerdiş bêro muhakemekerdene do dewleta tirkî sey dewletêk ke qirkerdiş kerdo kursîya versûcan de ronişo.”

TÊGÊRAYÎŞÊ SEYÎD RIZAYÎ YO BIRÛMET DO BIBO TÊGÊRAYÎŞÊ HEME KURDAN

Eşkerayîye de nê ameyî vatene: “Eke ma ewro eşkenê qalê şarêk ke Dêrsim de bi kurmanckî û kirmanckî qisey keno bikerê, no bi xatirê mucadeleyo ke serranê 1970an de ameyo dayene yo. Çîyê ke Seyîd Rizayî sêpaya îdamî de vatî seba heme şarê Kurdistanî herinda dersêk de yê. Şarê kurdî do sey Seyîd Rizayî hemverê qirkerdoxan de vejîyo û serre nêno ro.”    

MA DO HESRETA ÎNAN BICA BIYARÊ

Peynîya eşkerayîye de nê vajîyayî: “Sere de ciwanê kurdan heme Dêrsimijî û şarê Kurdistanî seba ke pîrê înan ê winayênî estê sereberz ê. Atakanî, Şîyarî, Dr. Baranî, Çetînî, Baran Dêrsimî, Medenîyî, Îsayî, Kemalî, Sarayî, Zîlanî, Sorxwînî, Rozayî û bi hezaran şehîdanê ma bingeyê pêgirewtebîyayîşî de mucadele da. Ma ciwan û şarê Kurdistanî rê veng danê ke şopa nê pîran de şirê; ma newe ra sozê bicaardişê hesreta înan danê. ”