KCK: Pêvînayîşê 12ê Çile eslê xo de seba ke hemleya ma ya “Ma tecrîdî bişiknê û faşîzmî birijnê” hetê îqtîdarê AKP-MHPyî ra bêro sabotekerdene teşebusêkê şerê psîkolojîkî yo. Xora roja Şemeyî bi lez û bez viraştişê ci zî nê eşkera ramojneno.
Hemserekîya Konseya Rayberdişî ya KCKyî derheqê pêvînayîşo ke Rayberê Şarê Kurdî Abdullah Ocalanî dir amebi kerdene eşkerayîyêka nûştekîye daye. Eşkerayîye de nê ameyî vatene:
“Sey Têgêrayîşê Azadîya Kurdan hemleya ma ya ‘Ma tecrîdî bişiknê û faşîzmî birijnê’ ke ma daya destpêkerdene her ware de bena vila û aver şina. Zîndanan de bi seyan tepişteyî bi hawayêkê biqerarî grevê vêşanîye de yê, şarê ma yo ke çar perçeyê Kurdistanî de yo û teberê welatî de yo zî bi çalakîyanê sey grevê vêşanîye, rayraşîyayîş, numayîş û protestoyan xoverdayîşê ma yê azadîye hîna kenê xurt.
Hayîdarî vila bîye ke roja 12ê Çile de îdareyê AKP-MHPyî birayê ci Mehmet Ocalanî seba ke Rayberê Şarê Kurdî Abdullah Ocalanî dir pêvînayîş virazo şirawito Îmrali. No ramojneno ke hemleya xoverdayîşî ya ‘Ma tecrîdî bişiknê û faşîzmî birijnê’ ke serkêşîya ci Leyla Guvene kerdebî serkewtişê xo yê cidîyî yê ewilênî bi dest fînayo. Nê bingeyî de ma şarê xo yê xoverdayoxî û dostanê xo pîroz kenê, dewamîya serkewtişanê înan wazenê.
NÊNO MANAYA QEDÎYAYÎŞÊ TECRÎDÎ
La pêvînayîşo ke 12ê Çile de Îmrali de virazîya nêno manaya qedîyayîşê tecrîdî. Tecrîd û zexto giran ê serê Rayber Abdullah Ocalanî dewam keno. Naye ra hemleya ma û şarê ma ya ‘Ma tecrîdî bişiknê û faşîzmî birijnê’ dewam kena. Ganî çew xelet fam nêkero. Pêvînayîşê 12ê Çile eslê xo de seba ke hemleya ma ya “Ma tecrîdî bişiknê û faşîzmî birijnê” hetê îqtîdarê AKP-MHPyî ra bêro sabotekerdene teşebusêkê şerê psîkolojîkî yo. Xora roja Şemeyî de ke rojêka betlaneyî ya kerdişê nê pêvînayîşî nê eşkera ramojneno.
MA DO BI KAYANÊ ŞERÊ TAYBETÎ NÊXAPÎYÊ
Eşkera aseno ke îqtîdarê AKP-MHPyî hemverê hemleya ma ya azadîye û xoverdayîşî de muracatê kayê şerê taybetî kerdo û wazeno ke xoverdayîşê ma bişikno. La ma hendî zulm û kayanê faşîstan zaf rind şinasenê. Naye ra ma do bi nê kayanê şerê taybetî nêxapîyê. Heta tecrîdê serê Rayber Abdullah Ocalanî nêwedarîyo ma do çalakîyanê xo yê xoverdayîşî bidomnê. Heme şarê ma, dostê ma û rayapêroyîye ganî na rastî wina bizanê. Hemleya ma ya xoverdayîşî do tecrîdî bişikno, faşîzmî birijno û nê bingeyî de Kurdistanî azad bikero û Tirkîya bikero de demokratîke.”
