Dewanê Qendîlî yê Başûrê Kurdîstanî de şewa pancşemeyî de vayrayîş na pa.

VARAYÎŞ BI DESAN DEWAN SER O TESÎR KERD

Varayîş qezaya Ranya ya Silemanîye û qezaya Soranî ya Hewlêrî de bi desan dewanê ser o tesîr kerd. Pirdo ke dewanê Surdê, Aşqulkê, Sergenel, Sînemokê û Qirnegê pabesteno rayîrê merkezî laseran ver  rijîya. Rijyayîşê laserî ra dima bi desan dewijê ke  dewanê Suredê, Sergenel, Senemokê û Qirneqe de cuyenê mehsûr mendî. Varayîş ra ceyran zî ameyo birnayene.

BANÎ RIJÎYAYÎ HÊGAYÎ BINÊ AWE DE MENDÎ

Goreyê xebaranê cayîyan dewa Qirneqe de 6, Biredê de 3, û Sinemokê de 1 ban rijîya. Dewanê bînan ra hema xeberêk nêameya girewtene û yeno vatene ke banê ke rijyayî zafêrî.

Herême de bostan û hêgayî zî binê awe de mendî la ganvîndîkerdiş çîn o.

GEVER DE DI DEWÎ AMEYÎ TEHLÎYEKERDENE

Qezaya Geverî ya Colemêrgî de varayîşo bi tesîrî ra di dewî ameyî tehlîyekerdene. Dewanê Alekanan û Kedyan de tesîrê varayîşî dewam keno. Alekanan de laseran ra xeylî banî binê awe de mendî. Kedyan de zî  Dereyê Çemînê ke mabênê ci ra ravereno şîlî ver ser şi. Dewijî merkezê bajarî rê ameyî tehlîyekedene. Varayîş ra dewijan ziraro maddî dî.

AMED DE KESÊK CUYA XO VÎNÎ KERDE

Amed de rayîro ke varayîşî ra xijanek bîyo de otobusek qeza kerd. Hemwelatijêk merd û 29 kesî zî birîndar bîyî.

Otobuso bi plakaya 23 ES 26  ke seferê Çewlîg- Amedî kerdêne nêzîdya mevkîya Yazilipinarî ya Dewa Mermerî ya Sûrî de qeza kerd.

ŞIRNEX Û MERDÎN DE VARAYÎŞ

Şirnex û Mêrdîn  de zî varayîşî tesîrê xo ramot. Xeylî banî binê awe de mendî,  xeylî serbanî raşîyayî û rayîrî qefilyayî.