PJAKî hemverê qerarê Amerîka yê derheqê kadroyanê PKKyî de reaksîyonêko pîl ramot û da zanayene ke qerar DAÎŞ, Erdogan û şerî rê xizmet keno. PJAKî vat : “Şarê kurdî do heta nefesê xo yê peyênî rayberan û mucadelekeran rê wayîr vejîyê.”
Eşkerayîya Partîya Cuya Azade ya Kurdistanî (PJAK) ya derheqê qerarê Amerîka de wina ya:
“No demo ke Rojakewtena mîyanêne de şerê dinya yo hîrêyin yeno dayene kurdî bi mucadeleyê xo yê azadîye bîyê aktorêko muhîm. Tewrê şorişgêrî û mucadeleyê demokratîkî yê şarî kurdî sîyasetê hêzanê serdestan ê dinya veng a vet. Nê hêzan seba menfaatanê xo ancî hêzê şorişgêrî sey hedef girewtî.
Amerîka seba ke têgêrayîşê azadîye bêtesîr verdo qerarêkê winayênî girewt. No qerar seba Amerîka şermezarîyêk o.
'QERARO KE DO ŞER HÎNA XORÎ BIKERO'
Amerîkaya ke teslîmkerdişê Rayber Apoyî yê bi Tirkîya de rol kay kerd, planê tasfîyekerdişê PKKyî û dişmenîya kurdan kerdî. Qeraro ke hetê Amerîk ra ameyo girewtene do şerê herême hîna bikero xorî û şidet hîna bibo vêşî.
'HETA NEFESÊ XO YÊ PEYÊNÎ MA DO WAYÎR VEJÎYÊ'
Ma sey PJAK seba ke qerarêkê winayênî girewto Amerîka şermezar kenê. Ganî Amerîka û Koalîsyon bizanê ke şarê kurdî do rayîr nêdo kayanê lîminan ê hêzanê serdestan.
VENGDAYÎŞ
Ma nê prosesê krîtîkî de veng danê heme şorişgêr, roşinvîr, nûştox, hunermend, sîyasetkar, ciwan û cinîyan ke hemverê qerarê Amerîka de vejîyê.”
