Qezaya Sûrî ya Amedî de qedexeyê tebervejîyayîşî yo ke 2ê Kanûne 2015 de amebi destpêkerdene kewt serra xo ya 4ine û sey qedexeyê tewr dergî yê dinya tarîxî de cayê xo girewt. Hemvatoxê Platformê Sûrî Talat Çetînkayayî babete ser o ANFyî rê qisey kerd.

QEDEXEYO TEWR GIRD Ê DINYA

Çetînkayayî bale ante polîtîkaya hêrişkare ya dewlete ser û va: ‘‘Mehlayê ke tede qedexe amebi îlankerdene nê rijnayê,  çîn kerdî la qedexeyê înan dewam keno. Qedexe semedê tebernêvejîyayîşê şarî yo la xora nê cayan de ne kuçe mend ne zî  çew esto.‘‘

CAYÊ TARÎXÎYÎ AMEYÎ ÇÎNKERDENE

Çetînkayayî wina dewam kerd: ‘‘Ma sey Platformê Sûrî tim ard ziwan ke Sûr de vera merdimîye û tarîxî sûc yeno kerdene. Ganî no qedexe cade bêro wedartene û qewimîyayîşê Sûrî bêrî eşkerakerdene. Sûr ke hetê UNESCOyî ra sey mîrasê dinya yeno zanayene de cayê tarîxîyî ameyî çînkerdene.‘‘

ŞARÊ SÛRÎ VERA DEWLETE BIHÊRS O

Çetînkayayî ard vîrî ke hêrişê dewlete serê şarê Sûrî de hema dewam kenî û wina domna:‘‘ Behaneyê sey şer û OHALî ramojnayî û bi zextî vengê şarî birna. Binê nameyê ‘umûmîkerdiş‘î de dest na bananê şarî ser a. Keyeyî hema seba wayîrvejîyayîşê mal û milkê xo mucadele kenî. Şarê Sûrî vera dewlete bihêrs o û hukmato ke qerarê qedexeyê kuçeyan girewt û bîyo sebebê rijnayişê bananê înan, ey ef nêkenî.

MA DEWAYAN KIRIŞENÎ MHME

Çetînkayayî qiseykerdişê xo wina qedîna:‘‘ Ma sey platformî paştî danî şarê Sûrî. Hemwelatijan seba wayîrvejîyayîşê heqanê xo dewayî akerdî. Ma zî nê dewayan kirişenî Mehkemaya Qanûnê Bingeyênî û Mehkemaya Heqanê Merdiman a Ewropa.‘‘