Hemsereka Sendîkaya Kedkaranê Weşîye û Xizmetanê Sosyalan (SES) a Wanî Fîgene Çolakogluyî derheqê krîzê xizmetanê weşîye de ANFyî rê qisey kerd.

Fîgene Çolakoglu îfade kerd ke xizmetanê weşîye yê esasan de rijîyayîşî est ê û 9 şaristananê herêma Serhedî de  tay beşan de têna yew doktor/e est o/a. Fîgene Çolakoglu pare kerd ke şaristan de kadroyanê xizmetanê weşîye de kêmasîyî est ê û bi taybetî tay branşan de hûmara doktoran sînordar a. Fîgene Çolakoglu ard ziwan ke nêweşî nêeşkenê sîstemê randevuyan ra randevu bigêrê.

Fîgene Çolakoglu vist vîrî ke krîzê ekonomîkî ra doktorî şinê teberê welatî û vat: ''Çew nêeşkeno na babete de doktoran sûcdar bikero. Çunke heqê doktoran yenê xespkerdene, doktorî nêeşkenê heqê destê xo bigêrê. Seba ke hûmara doktoran tay a coka xebatkarê weşîye û şar yenê têverakerdene.''

Fîgene Çolakoglu îfade kerd ke bi taybetî tay nêweşxaneyanê Wanî de doktorî zaf kêm ê û vat: ''Nêweşxaneyê herême û zanîngehî de yew yan zî di doktorî est ê. Wan şaristanêko metropol o, şaristananê bînan ra zî nêweşî yenê tîya la seba ke doktorî çin ê hûmara nêweşan vera zêdîyena. Wan de merdimê feqîrî nêeşkenê heqê weşîye bişuxilnê. Ma vanê wa her kes bi hawayêkê têdûştî û bêpereyî bieşko xo biresno heqê weşîye.''