Namzetanê Amedî yê Partîya Çep a Keske ra Cengîz Çandaro ke Amed de xebatanê weçînayîşan keno, derheqê çimdarîyanê xo de ANFyî rê qisey kerd.

Çandarî da zanayene ke her ca de şarî înan rê destek û perwerîya xo mojnaya û vat: ''Mi şarî ra hende yew eleqe nêpawitêne. Şarî bêmesafe, bi heskerdişêkê pîlî verarê xo ma rê akerd. 7 serran o ez Tirkîya de nêbîya. Nika ez hewteyêkî ra nata Amed de ya. A raşte mi vatêne ez do weçînayîşan ra dima abigêra. La eleqeyê şarî ra dima mi wina hîs kerd ke seke ez tim tîya de bîya.''

Çandarî zîyaretê Amedî yê Erdoganî ercna û vat: ''Erdogan nêeşka ke 3 hezar kesan zî bîyaro mîtîngê xo. Mi dî ke zîyaretê ey rojdemê çewî de çin bîyo. Mi dima eşnawit ke o ameyo. Qetî rojdem nêbi. Erdogan xemê Amedî de nîyo. Xemê Amedî de teyna no est o ke wa 14ê gulane bêro û no zulm biqedo. Şarê herême hînî teyna wazeno ke Erdogan wa şoro. Tîya de wextê şuxilnayîşê AKP û Erdoganî qedîyayo. Coka Partîya Çep a Keske zî armanc kerdo ke Amedî ra 12 wekîlan veja. Xêr ser o AKP-MHP 14ê gulane ra dima sîyasetê nê welatî û na dinya ra bêro estaritene.''