Endamê Komîteya Abdullah Ocalanî rê Azadîye Mihemed Bekir: Yew çeku û cumleya Rayber Apoyî eşkena înan bin bikera, bivurna. Pêro hêzê pîlî yê dinya zî cumleyêka Rayber Apoyî ra tersenê. No pîlîya Rayber Apoyî ya.
Endamê Komîteya Abdullah Ocalanî rê Azadîye Mihemed Bekir serrgêra Komployê Mîyanneteweyî yê 9ê Teşrîna Verêne de ANFyî rê qisey kerd.
Mihemed Bekirî ard ziwan ke Rayberê Şarê Kurdî Abdullah Ocalanî nê 24 serran de zî qetî têkoşînî ra fek vera nêdayo û vat: ''Pêro xîretê Rayber Apoyî seba çareserkerdişê meseleya kurdan ê. Hêzanê serdestan kerd ke verê xebat û xîretanê Rayber Apoyî bigêrê. La Rayber Apoyî zîndanê Îmraliyî de zî xoverdayîşî rê dewam kerd û bi paradîgmaya xo vurnayîşê pîlî afernayî. Ey bi afernayîşê sîstemê Îdareyê Xoserî û Konfederalîzmê Demokratîkî warê stratejîkî de serkewtişê pîlî vetî meydan.
Hema zî komplogerî tecrîd de israr kenê. Sîstemê Îmraliyî dewamê sîstemê komplogeran o. Sîstemê Îmraliyî komplo û îşkence de israr keno. Mîyanê sîstemê Îmraliyî de têna dewleta tirke nê pêro hêzê serdestî yê dinya est ê.''
Mihemed Bekirî îfade kerd ke seba ke hêzê komplogerî û Tirkîya Rayberê Şarê Kurdî ra tersenê sîstemê tecrîd û îşkenceyî anê ca. Bekirî vat: ''Rayber Apo wazeno bi manîfestoyanê xo cuyêka newîye awan bikero. Sena ke no hesabê hêzanê serdestan rê nêno wazenê ey tecrîd bikerê. Eke ê rayîr nêdanê pêvînayîşê keye û avûkatan Serek Apoyî rê tersenê. Yew çeku û cumleya Rayber Apoyî eşkena înan bin bikera, bivurna. Pêro hêzê pîlî yê dinya zî cumleyêka Rayber Apoyî ra tersenê. No pîlîya Rayber Apoyî ya.''
