Çewlîg de serkêşîya KCD, HDK, TJA, DBP û Partîya Çep a Hewze de şayîya Newroze ameye kerdene. Şayîya ke Warê Newroze yê Taxa Sarayî de ameye kerdene rixmê varayîşê şilîyî bi hezaran kesî tewrê ci bîyî.

Şayîye de slogana “Bijî Serok Apo” bîye berze û pankartê  ''Wa Çewlîg bibo herêma afate'' ame akerdene.

Şayîye bi rêzgirewtişî dest pêkerde û dima bi nameyê Komîteya Amadekerdişî ya Newroze Zayîm Bagbarsî qisey kerd.Bagbarsî ard ziwan ke seba ke tedbîrî nêameyî girewtene hende kesan erdlerzî de dinyaya xo bedilnaye û vat berpisîyarê nê hukmatê AKPyî yo.

Hemserekê HDPyî yê Bajarî Feyzullah Şeyhanogluyî vist vîrî ke hukmatî çirey verê afatanê xozîyîyan tedbîrî nêgirewtî û vat: ''Şar do 14 gulane de cebê ci bido. Ma do hukmatî ra hesabî bipersê. Ma do bi ruhê Kawayan cewabê Dehaqan bidê.''

Endama Merkezê Partîye yê DBPyî Nurtene Uzumcu vat: ''Peynîya nê îqtîdarî ameya. Ma do pêro pîya vera na neheqîye, bêhuqûqîye vajê hinî bes o. Ma do xebata vîjnayîşî xurt bikerê û ser bikewê.''

Hemsereka HDPyî ya Çewlîgî Mîhrîbane Ekîncî  şîîra Newroze wende û qiseykerdişê qefilnayîşî Wekîlê HDPyî yê Çewlîgî Erdal Aydemîrî kerd.

Aydemîrî vat: ''Şarê kurdan çirey milê çewt nêkerd û ewro ra tepîya zî çewt nêkero. 14ê gulane de şarê ma do cewabê kerdişanê hukmatî bido. Ma do bi ruhê Kawayan îqtîdarê Dehaqan birijnê.

Badê qiseykerdişan bi slogananê “Bijî Serok” ve “Bijî Serok Apo” adirê Newroze ame tafînayene.

Hunermende Evîne Sindî û dengbêjo herêmî Fettah Yalçinî zî bi deyîranê xo reng da şayîye.