Wekîlê Partîya Çep a Keske yê Wanî Sînan Çîftyurekî derheqê prosesê neweyî û rolê AKPyî de ANFyî rê qisey kerd.

Çîftyurekî pare kerd ke Erdogan reyna wazeno hem bi rolê îqtîdarî hem zî bi rolê muxalefetî têbigêro û vat: ''Erdogan wazeno muxalefetê xo biaferno la krîzê sîyasî û ekonomî ra mumkîn nîyo ke ney îdare bikero. Erdogan sondwerdişê serekkomarîye de pare kerd ke wazeno şarê kurdî de pêbikero. O çax ganî nê çîyan bikero;

Ganî wezîfeyê şaredaran apey bêrê dayene înan, 79 rojnamegerî wa vera bidîyê, peynîya tecrîdê Îmraliyî wa bêra aerdene, sîyasetê cîyakerdişî yê vera elewîyan wa bêro qedînayene û waştişê înan bêrê caardene. Heta ke nê waştişî nêrê caardene wa qala haştîye nêra kerdene. Eke Erdogan wazeno kurdan de biratîye bikero o çax ganî Qanûnê Bingeyî de estbîyayîşê şarê kurdî wa bêro qebulkerdene, perwerdeyê bi ziwanê dayîke bêro caardene. Erdogan vano 'welat de haştîye, dinya de haştîye.' La Erdogan di parçeyanê Kurdîstanî de pozîsyonê îşxalî de yo. Eke Erdogan haştîye wazeno ganî hêzê xo yê leşkerî herêmanê kurdan ra apey bianco.''

Çîftyurekî nîqaşê serê netîceyanê weçînayîşan vistî vîrî û vat: ''Xora netîceyê weçînayîşî yê 14-28ê gulane de mîyanê kadro û girseyanê HDPyî de bi hawayêkê hîrayî yenê nîqaşkerdene. Bingeyî ra, dewan ra heta merkezî ganî ma nîqaşî bikerê. Ganî stratejî û taktîkê sîyasetî bêrê ercnayene. Wexto ke no bêro kerdene ganî kes û kesayetî nêbê hedef. Kam beno wa bibo ganî ziwanêkê krîmînalî nêro şuxilnayene. Sîyasetê kurdan wexto ke kêmasîyanê xo nîqaş keno ganî ziwanêko ke dişmen pê kêfweş beno, nêşuxilno.  Ganî seba şarê ma gamêke bierzo.''