Endama Konseya Rayberdişî ya KJKyî Çîgdeme Dogu derheqê weçînayîşanê 14ê gulane de ANFyî rê qisey kerd. 

Qiseykerdişê Çîgdeme Dogu ra tay noqtayê girîngî wina yê:

''Nê weçînayîşan de ganî cinî, ciwan, hêzê demokrasî û çepgîrî yew bibê. Ganî bi hawayêlê lezabezî no îqtîdar bêro rijnayene, pêro sûcê ci zî bêrê teşhîrkerdene. Îqtîdarê AKP-MHPyî komel jehrîn kerd û qirkerdiş ferz kerd. Ganî serra 100. ya Komare de rayîrê demokrasî bêro weçînayene. Ganî na seserre cinî, komel û xoza bibê merkez û cuye newe ra bêra awankerdene. Nê weçînayîşan de ganî rayîro hîrêyîn yanî Partîya Çep a Keske-Îtîfaqê Kede û Azadîye bêrê weçînayene. Partîya Çep a Keske do qederê seserra diyîne ya komare dîyar bikera. Coka her kes wa bi mesuldarî têbigêro.

Îtîfaqê Cumhurî (AKP-MHP-BBP-YRP û Hûda Par) dişmenê cinîyan, kurdan, kede û komelî yo. Hînî peynîya Erdoganî zî peynîya nê îtîfaqî zî ameya. No îtîfaq û îqtîdar ganî hesabê qirkerdişanê xo bidê. Îqtîdarê AKP-MHPyî bi taybetî cinî û kurdî pê polîtîkayanê şerê taybetî mehkum kerdî. Wextê nê îqtîdarî de faîlê cînayetanê cinîyan vera dîyayî, nasnameyê cinîyan bîyî metayêke, serdestîya camêrdan bihêzêr bîye, îradeyê cinîyan ame xespkerdene, Vakurê Kurdîstanî de sîyasetmedarê cinîyî ameyî rehînkerdene, reyna Vakur de şîdet û tecawuzê unîformakerdeyan zêdîyayî, cinîyê kurdî zîndanan û her cayê dinya de ameyî qetilkerdene û destkewteyê cinîyan ameyî xespkerdene. Seke zanîyeno tewr peyên Peymana Îstanbulî bi fermanêkê Erdoganî amebî betalkerdene. Îqtîdarê AKP-MHPyî cinîyan rê o 'qeder' xêz kerd. 

Cinîyî ganî vera nê îqtîdarî têkoşînêko rêxistinkerde û yewbîyaye bikerdêne la wina nêbi. Nika cinîyî ganî têkoşînê xo bikerê yew, xo rêxistin bikerê, xo bipawê û yew bibê. Ganî nê çîyî bibê stratejîya têkoşînê cinîyan. Cinîyî ganî bi wesîleya weçînayîşanê 14ê gulane hêzê xo yê hemparî bimojnê. Cinîyî eke raya xo bidê Partîya Çep a Keske do Meclîs de bi xurtî bêrê temsîlkerdene. Ne Îtîfaqê cumhurî de ne zî Îtîfaqê Miletî de seba cinîyan yew çareserîye çin a. 

Hêzê cinî û ciwanan ê rêxistinkerdeyî do faşîzmî bişawê. Ganî cinî, ciwan, kedkar û şarî pê xo bawer bibê, îradeyê xo bimojnê, raya xo bidê û peynîya nê îqtîdarî bîyarê. Ciwanî wa nê weçînayîşan de raya xo bidê xo yanî Partîya Çep a Keske. Reyna pêro nasnameyê ke yenê înkarkerdene; elewîyî, çerkezî, lazî, kurdî wa hetê Partîya Çep a Keske de cabigêrê. Wa yew raye zî zayî nêba. Ganî şarê ma asayîşê sindoqan zî bîyaro ca. Eşkera yo ke no îqtîdar binkewtişê xo ra dima plananê kaos û krîzî do bivisno dewre. Ganî şarê ma û cinîyî vera nê planan, dek û dolabê îqtîdarî hayîdar bibê. Ganî çew bi hawayêkê bêcîdîyetî nêzdîyê weçînayîşan nêbo û wa îqtîdar bêro rijnayene. Ganî sindoqan de planê kaosî bi tewirê rêxistinkerdeyî bişawîyê gorî.

Ma 15ê gulane de çimanê xo şewdirêkê rindî rê akerê. Ma do nê plananê qederî parçe bikerê û qederê xo bi azadî binusê.''