1992 de Mêrdîn de Selahattîn Demîr amebi tepiştene û cezaya muebeda girankerde dîyabî ey. Demîro ke Zîndanê Bafra de tepişîyeno, pê telefonî keyeyê xo de qisey kerd û da zanayene ke Heyetê Çimdarîye yê Îdareyî bi bahaneya 'halê ci hol nîyo' înfazê ey û ê 5 tepişteyan 3 mengan apey eşto.

 Cinîya Demîrî Latîfe Demîra ke 7 serrî yo nêşîya pêvînayîşî vera bire nêrazîbîyayîşê xo mojna.  Latîfe Demîr îfade kerd ke mêrdeyê ci heta nika Zîndananê Yozgat, Mêrdîn, Mîdyat û Bafra rê ameyo surgunkerdene û seba ke o kurd o nêno veradayene. 

Latîfe Demîr vat: ''Tewr peyên 2015 de Nisêbîn de ez şîya pêvînayîşê ey. O çax înan mi rê heqaret kerd, cigêrayîşo rût kerd. Ez nê kerdişan ra hînî nêşîya. Rixmê hende ezîyetî înan nêverda ke ez mêrdeyê xo 15 deqayan bivîna. Ê zanenê ke ma destê înan esîr ê. Ma dewlete ra têna heqê xo wazenê.''