Endamê Komîteya Rayberdişî ya PKKyî Murat Karayilanî Bernameyê Taybetî yê Stêrk TVyî de rojdem ercna.

Qiseykerdişê Karayilanî ra tay noqtayê girîngî wina yê:

''Seba şiknayîşê tecrîdî û azadîya Rayber Apoyî şarê ma tim payan ser de yo. Tewr peyên Dusseldorf de seba azadîya ey mîtîngêko pîl ame kerdene. Dewleta tirke û hêzê hegemonîkî fikranê Rayberîye ra tersenê coka tecrîdî nêqedînenê. Rixmê tecrîdî zî paradîgmaya Rayber Apoyî pêro dinya de hînî zanîyena. Ma Konferansê Hamburgî de no çi dî. Rixmê astengkerdişê dewleta Almanya zî Hamburg de fikrê Rayberîye ameyî nîqaşkerdene. Ma rê sereberzîyêka pîl a ke kurdêk wina tesîrê dinya keno. Ewro fikrê ey warê globalî de qebul benê û benê hêvîya şaran.

Hêrişê îşxalî yê dewleta tirke 14ê nîsana 2022yî ra nata bêmabên dewam kenê. Seba ke ê nêeşkayî gerîlayan herêman ra vejê hema zî wina hêriş kenê. Înan Zap de tay cayî îşxal kerdbî la dima ê neçare mendî ke nê cayan ra xo apey biancê. Nika teyna Girê FMyî yê Zapî de ê est ê la gerîlayî zî uca de yê. Nê pêro binkewtişê artêşa tirke îsbat kenê. Dewleta tirke rixmê hende hêrişan û teknolojîye zî nêeşkaye Zap, Avaşîn û Metîna îşxal bikera. Îşxalkerî Zap de kilîdkerde bîyî. 

Ma bi beşdarîyêka hîra kombîyayîşê Konseya Fermandarîye kerd û prosesê şerî ercna. Ma nê prosesî de xoverdayîşêko pîl mojna. Xora ma bedelî zî dayî. Nê serkewtişê ma de bara xoverdayîşê Rayber Apoyî, şarê ma est a. Ma na serra şerî de 259 şehîdî dayî. Nê embazanê ma peyê xo de mîrasêko pîl verda. Xoverdayîşê înan dişmen vindarna. Nê şerî de dişmenî zî vînîbîyayîşê pîlî dayî. Mesuldarê nînan zî Erdogan o. Erdoganî çend rojî verî Amed de reyna zûrî vatî. Ma nê înan masaya haştîye verdaye de. Înan cara waşt ke pêro kurdan qetil bikera. Xora ma vera nê armancê înan xo ver danê.

Tay cenazayê leşkeranê înan destê ma de yê la nê xemê înan de nîyê. Nika destê ma de di cenazayî est ê. Artêşa tirke wayîra cenazayanê xo zî nêvejîyena. Nameyê nê cenazayan wina yê: Mustafa Bazna, nameyê dadîye: Dondu, nameyê babîyî Ramazan, Duzce ra yo. /Nacî Kaygusuz. Maye: Şengule. Babî: Saîm. Eskîşehir Tepebaşî ra yo.

Eke heyetê sivîlî bêrê Amedîyê, ma de îrtîbat virazê; ma do cenazayan bidê înan. Ma hê aşma bimbareke Remezanî de yê. Eke keyeyê nê leşkeran zî bêrê, ma do cenazayan bidê. Hişmendîya AKPyî de wijdan çin o. Ê cenazayanê xo vêşnenê, terk kenê. Ganî şarê Tirkîya na raştîye bivînê.

No şer sîyasî yo. AKP-MHP keno ke vera ma ser bikewê û bi nê hawayî weçînayîşan de zî ser bikewo. Eke înan gerîlayî tayfîye bikerdêne faşîzmê AKP-MHPyî do dewam bikerdêne. O çax înan muxalafet binpay kerdêne, şar qels kerdêne û rejîmê xo kerdêne mende. Nê pêro hetê sîyasî yê nê şerî yê. Ma wazenê demokrasî, azadîye û haştîye bêrê welatî. La îqtîdarê AKP-MHPyî tam eqsê ci fikirîyeno.

Îtîfaqê Miletî zî sey Îtîfaqê Cumhurî qayîl nîyo ke meseleya kurdan çareser bikero. La heta ke na mesele çareser nêba demokrasî nêna Tirkîya û eke demokrasî nêra krîzo ekonomîk zî nêqedîyeno. Masaya 6an (Îtîfaqê Miletî) nika verê xo nêdano çareserîya meseleya kurdan. Coka ganî hêzê demokratîk-welatperwerî bi xurtî nê weçînayîşan de ser bikewê, şorê Meclîsî û meseleya kurdan çareser bikerê. Ganî Îtîfaqê Kurdîstanî û Îtîfaqê Kede û Azadîye keye bi keye bigêrê. Ganî nê bi taybetî keyeyanê dîndaran ser o vinderê. Çira? Çunke eleqeyê kerdişanê AKPyî ne bi Îslamîyetî, ne bi merdimatîye û ne zî bi huqûqî est o. Seba ke şarê ma ney bivînê xebatê weçînayîşî girîng ê.

Ganî kesê ke raştê neheqîyan ameyê, raya xo nêdê AKP-MHPyî. Çunke AKP-MHP de ne rehme ne zî wijdan est o. Hêzê demokratîk û welatperwerî wa keye bi keye bigêrê û nê çîyan şarê ma rê vajê. Îtîfaqê AKPyî îtîfaqê dizd û kiştoxan o. Şarê ma wa ney bivîno, tewirêkê neteweyî bimojno û vera nê dişmenanê kurdan vejîyo Weçînayîşan rê tay mend o. Eke kurdî û hêzê demokratî yew bibê do bieşkê meseleyan çareser bikerê. Kam ke nê dewrî de seba AKP-MHPyî xebitîyeno xo rê nêngan çineno. Bi taybetî dadîyî vanê 'Wa her kes pê wijdanê xo raya xo bido xo.' Eynî wina yo. Wa her kes raya xo bido xo.''