Wekîlê Partîya Demokratîke (DEP) yê Mêrdînî Mehmet Sîncar 1993 de hetê paramîlîteranê dewleta tirke Hîzbullahî ra amebi qetilkerdene. 30 serrî yo dewaya qetilkerdişê Sîncarî dewam kena. Dewa de teyna endamê Hîzbullahî tetîkkeş Cîhan Yildiz yeno muhakemekerdene û o zî 11 serran zîndan de mend. Qanûnê 'wextvîyartişî' yo ke wextê AKPyî de ame amadekerdene beno sebeb ke dewaya Sîncarî bikewa war. 

Cinîya Mehmet Sîncarî Cîhane Sîncar ANFyî rê qala Mehmet Sîncarî û prosesê dewa kerde.

Cîhane Sîncar ard ziwan ke Mehmet Sîncarî bi kurdayetîya xo ya samîmîye şinasîyayêne û vat: ''Wexto ke o bibi wekîl mi tira vatbi ke do bimiro. La ey vat 'Heta ke emrê mi destûr bido ez do têkoşîn bikera.' Xora dima ke bi wekîl kewt mîyanê adirî. Sîstemê qoricîtîye vila bibi, dewî vêşîyayêne, faîlî meçhûlî qewimîyayêne. Seba ke Mehmet wekîlîye ra fek vera bido dewlete babîyê ey tepiştbi. Suleyman Demîrelî bi xo venga Mehmet dabi û ci rê teklîf kerdbi ke cînayetanê faîlî meçhulan cinêgêro û o do îhaleyan bido Mehmetî. No zaf zorê ey şibi. Ey bi rojan vatbi 'Senî mi rê çîyo winayên teklîf beno. 

Mehmet seba ke tewrê cenazayêke bibo şibi Êlihî. Uca de Mehmet û Metîn Ozdemîr ameyî qetilkerdene. Cenazaya ey hewteyêk ameye vindarnayene. Dewlete destûr nêda ke cenazaya Mehmetî bi merasîmêkî bêra definkerdene. La ma qebul nêkerd. Ma vat ke cenaza yê ma ya, yê şarê kurdî ya. Babîyê Mehmetî zaf israr kerd la dewlete qebul nêkerd. Çend karkeranê şaredarîye Mehmet defin kerd.''

Cîhane Sîncar wina qala dewaya Mehmet Sîncarî kerde: ''Dewa bi serran dewam kerd. Rayîrê huqûqî yê dewa Enqara de qedîyabî. Dima ke dosyaya Hîzbullahî ameye akerdene, serebûtê Mehmetî zî newe ra tewrê dosya ameyî kerdene. Ma zî tewrê dosya bîyî. Ewro qala 'wextvîyartişî' yena kerdene. Se beno wa bibo Mehmetî bi tîpanê zerrnênan zerrîya şarê xo de cayê xo girewto. Dosya bêra qefilnayene zî şarê ma do qetî têkoşînê ey xo vîr a mekero û rayîrê ey de dewam bikero. MEhmet pê destê dewlete kişîya û dewlete do hesab bida.''