Şarê Şingalî hêrişê dewleta tirke ya îşxalkere şermezar kerdî û vat: ''Bi nê hêrişan nêeşkenê îradeyê şarê ma teslîm bigêrê.'' Seba vergirewtişê hêrişan şingalijan venga komelê mîyanneteweyî da.
Teyarayannê çekdaran ê dewleta tirke ya îşxalkere perey bajarekê Xanesorî yê Şingalî de keyeyêk kerdbi hedef. Şingalijan vizêr cayê bombardumanî de bi eşkerayîyêke hêriş şermezar kerd.
Eşkerayîye hetê Endamê Meclîsê Xanesorî Elî Hamidî ra ameye wendene. Elî Hamidî da zanayene ke hêriş de zerarêk nêresayo çewî ser û vat: ''Nê hêrişî armanc kenê ke şarê ma anêgêro erdê xo.La dişmen pê nê hêrişan do nêeşko îradeyê şarê ma bişikno. Ma sey komelê êzidîyan tarîx de zaf hêriş û fermanî dîyê, dejî antê la ma qetî teslîm nêbîyê. Ma venga pêro dezgehanê mîyanneteweyîyan danê ke vera nê hêrişan bêveng nêmanê û Erdoganî vindarnê.''
Nameyê Têgêrayîşê Azadîya Cinîyan ê Êzidîyan (TAJÊ) ser o Zabîda Şengalî qisey kerd û pare kerd ke nê hêrişî do nêeşkê ke şarê Şingalî Peymana 9ê Teşrîna Verêne qebul bikero. Zabîda vat: ''Hukmatê Iraqî ganî hesabê nê kerdişan û hêrişan biperso.''
Şêx Kemalo ke bombarduman de keyeyê ci amebi hedefkerdene vat: ''Teyna yew keyeyê mi est bi, o zî hêrişê dewleta tirke de xera bîyo.''
Eşkerayîye bi sloganê 'Biciwîyo xoverdayîşê Şingalî' qedîyaye.
