Asayîşê Neteweyî yê Iraqî  (Emin El-Weteni)  û artêşa Iraqî nêzdîyê 30 keyeyan ke Qirkerdişê Êzidîyan ê 2014î de paştî daye çeteyanê DAÎŞî, peyser şawitî Şingalî. Şarê Şingalî vera nê werişt payan ser.

Şarê şingalî vera Asayîşê Neteweyî yê Iraqî  (Emin El-Weteni)  û artêşa Iraqî hêrsê xo ard ziwan û vat: “Êyê ke destê înan de gonîya êzidîyan est a, şima sareyê ma bibirnî zî ma destûr nêdanê ê peyser agêrê. ”

Şarê êzidî  vejîya kuçeyan û vera hêzanê Iraqî çalakîya protestoyî kerde. Badê nêrazîbîyayîşê êzidîyan 2 kesê ke tewtê qirkerdişî bîyî hetê polîsanê Iraqî ra ameyî destbendkerdene. Şar verê merkezê polîsan de ame pêser, vat qey çeteyî heta ewro nêameyî cezakerdene û waşt nê wird çeteyê ke ameyî destbendkerdene wa teslîmê Asayîşê Êzidxanî û hêzanê YBŞyî bibê.

Hetê bînî ra polîsanê Iraqî Asayîşê Êzidxanî û hêzanê YBŞyî reyde kombîyayîş kerd û qerar ame girewtene ke Asayîşê Êzidxanî û hêzê YBŞyî zî do cipersayîşê wird çeteyanê ke ameyî destbendkerdene de ca bîgêrê.

Bado ke waştişê şarî ame ca şarî dest pê vilabîyayîşî kerd.