Endama Koordînasyonê KJKyî Rewşene Mardîn beşdara ''BernameyaTaybet'' ya Stêrk TVyî bîye û hêrişê îşxalî yê dewleta tirke yê vera Başûrê Kurdîstanî û xîretê yewîya neteweyîye ercnayî.

Qiseykerdşê Rewşene Mardîn ra beşêk wina yo: 

''Ez hêverî embaze Zîlane û pêro şehîdan yad kena. Ma do rêçê aye de ser bikewê. Dewleta tirke ya faşîste wextanê peyênan de cara hêrişê sivîlan kena. Wazena ke şar vera PKKyî nêrazîbîyayîşê xo bimojno. La şar zaneno ke PKK kam o. Ma Başûrê Kurdîstanî de mîyanê şarê xo de yê. Tay kesê Hukmatê Herême wazenê ke ma Başûrî ra bivejîyê. La ma serra 1983î ra nata uja de têkoşîn kenê. Uja Kurdîstan o. Ma pêro heman dej ancenê, dişmenan sînorê viraşteyî xistî mabênê ma.

Şarê ma yê Başûrî bi serran vera Saddamî şer kerd û ser kewt. Şarê ma nika asatêka berze de vengê xo berz keno la ganî hîna xurtêr bikero. Seba naye zî cinîyî eşkenê rayberîye bikerê. Teyarayê dewleta tirke 24 saetan şaristanan ser o gêrenê, şar eciz kenê. Psîkolojîya domanan xeripîyaye. Na neheqî ya. Ganî şar rayberîya cinîyan de vera naye wurzo payan ser û nêrazîbîyayîşê xo bimojno.

Gerîlayî 6 serrî yo ke Heftanîn de binê bombardumanan de xo ver danê. Xoverdayîşê gerîlayan do xurtêr bibo. Ma sey cinîyan bi taybetî ê Heftanînî gerîlayan fîraz kenê ke destanan nusenê. Ma zerrî û canî ra înan rê selam kenê û xoverdayîşê înan fîraz kenê.

Dewleta tirke game bi game Kurdîstan îşxal kena, siba do Hukmatê Herême zî do nêmano. Eke PKK qels bibo dor do bêro nînan. O çax ê do se bikerê? Coka ganî ma dişmenanê xo hol bişinasnê. Wext wextê yewî yo. Eke kurdî yewîya xo awan nêkerê meseleya kurdan do se serran ê bînan zî dewam bikera. Mesele PKK nîya, sivîlî kişîyenê. Mesele heqê Kurdîstanî yê, destkewteyê kurdan ê. Coka ganî Hukmatê Herême tay şarê xo  bifikîro. 

Şarê ma yê Başûrî ganî pêşmerge, cinî û ciwananê xo reyde wurzo payan ser, îşxalî rê vajo bes. Şarê Başûrî yewo sey Saddam bin kerd. Ma venga şarê xo kenê ke wext wextê têkoşînî yo. Ma do pê têkoşîn û xoverdayîşê xo destkewteyanê xo bipawê.

Prosesê pandemîye de Vakurê Kurdîstanî de şîdetê vera cinîyan zêdîya. Hukmatê AKPyî pê hîşmendîya DAÎŞî vera cinîyan têgêreno. Çira hende vera cinîyan ê kurdan hêriş yeno kerdene? Çunke pêro cinîyê dinya rêxistin, partî, sîyasetê cinîyan ê kurdan ra îstîfade kenê, cinîyan ê kurdan sey rayber vînenê. 

Îmrali de şero ke çar parçeyanê Kurdîstanî de qewimîyeno ra giranêr vera Rayberê ma yeno kerdene. Rayberîya ma pêvînayîşê xo yê telefonî de yewîya kurdan ser o vindert. Mîyanê tecrîdê giranî de Rayberê ma seba ke metodê çareserîya meseleya kurdan pare bikero xo resna şar.  Rayberê ma serra 1993î de seba yewîya neteweyîye zaf xîret kerd. Eke yewîya ma nêra awankerdene ma do nêeşkê destkewteyanê xo bipawê. Rojawan de sena naye xîret esto. La ganî pêro parçeyanê Kurdîstanî de no xîret bibo. 

No wext wextêko zerd o ke ganî ma destê xo ra nêdê. Heqê çewî çin o ke ma îstîsmar bikero. Ma sey têgêrayîş wazenê ke çi keweno milê ma ma bikerê. Ma seba ke kurdî bibê yew têkoşîn kenê. Hetr parçeyanê Kurdîstanî de şar û cinîyî vera îşxalî payan ser o yê. Wextê ci yo ke ma têkoşînê xo xurtêr bikerê. Ganî ma paştî bidê gerîlayanê azadîye. Bi nê hawayî ma eşkenê îşxalan çin bikerê.''