Qezaya Erdîşî ya Wanî de vîjnayîşanê pêroyî û herêmî de HDPyî se ra 70 ra zafêr rayî girewtî. Şarê kurdî yo ke bi Partîya Çep a Keske kewno vîjnayîşî,  Tirkîya Kurdîstan de heyecano gird afirna. Partîya Çep Keska ke şarî ra paştdayîşê gird gena kena ke Erdîş de se ra 90 rayan bîgêro.

Yaşar Kucaş: Ma do rayanê HDPyî dilab-hîrlab bizêdinê. Ma vînenî ke îqtdar û blogê ci ser û bin bîyî. Şar nê îqtîdarî ra razî nîyo.  Beno ke Partîya Çep a Keske emser mebo îqtîdar la do bibo muxalefeto tewr xurt. Ewro ra tepîya kes nêeşkeno verê têkoşînê kurdan de vindero. Înan dî ke hemverê înan de heqîqet est o. Çew nêeşkeno heqîqetî bin bifîno. Na rey mebo zî Partîya Çep a Keske vîjnayîşê bînî de do semedê îqtîdarî bixebito.

Mehmet Polat: Ma do pê Partîya Çep a Keske serekkomarî bibedilnê. Şarî rîyê înano raşt zaf rind dî. Enflasyon zaf şîyo dîyar. Şar nêeşkeno çîyêk bierno. Hêvîya her kesî Patîya Çep a Keske ya, çimê her kesî partî de yo û ma do ser bikewê. Ma şewe roje mîyanê şarî de gêrenê, xebityenê ke wa her kes rîyê înano raşt dahîna rind bivîno.

Hemsereka Partîya Çep a Keske ya Erdîşî Muyessere Îşleyen: Xebatê vîjnayîşî zaf rind ravîyarenê. Ma keye bi keye, kuçe bi kuçe gerêne. Ma pê bawer ê mado ser bikewê.  Bitaybetî cinîyî zaf xebityenî. Ma di pê cinîyan ser bikewê. Ma do nê vîjnayîşî de maneyê AKPyî bişiknê. Ma do sey cinîyan ê kurdan ser bikewê. Ya do bibo ya zî do bibo.

Xanime Dînç: Ma do dewe bi dewe, kuçe bi kuçe, keye bi keye bigêrê û bixebitê. Ma do nê zilmê serê xo wedarê. Partîya ma do ser bikewo û AKP bin bikewo. Bi serran o serê domananê ma de, şehîdan û tepişteyanê ma de zilmo gird est o. Ma do nê zilmî wedarê.

Hemserekê Pêroyî yê  DBPyî yê Erdişî Şîrîn Kahraman: Xora şarê kurdî musaye yo, partîyê kurdan tim yenê qefilnayene. Partîya Çep a Keske demê kilmî de xo da naskerdene û heme xebatê xo kerdî. Şarî cade partîya xo ya newî qebul kerd. Coka ma pê bawer ê ke ma do ser bikewê. Îqtîdarê 20 serran çi felaketî ardî welatî ser, her kes zano. Sîstemê diznayîş û talanî dewam keno. Hetê ekonomî ra şar zaf tengayî de yo û vera îqtîdarî hêrsbîyaye yo. No nêrazîbîyayîş do sandiq de xo ramojno.