Hakan Arslano ke wextê qedexeyê tebervejîyayîşî yê Sûrê Amedî de 2ê kanûna 2015î de şehîd bibi esteyê ci 7 serran ra dima hetê Dozgerîya Komare ya Amedî ra  zereyê yew tewreyî de dîyabî babîyê ci.

Serkêşîya şûbeyanê MEBYA-DERî yê Amed û Wanî de  Îdarekar û endamanê KCD,HDP, DBP, TJA, TUAY-DER,  MED-DER dewa Çavuşlu ya qezaya Karayazi ya Erziromî de keyeyê Arslanî zîyaret kerd. Bi seyan kesê ke vere mezelanê dewe de ameyî têhet bi slogananê  “Bijî Serok Apo” û “Şehîd namirin” ver bi keyeyê Arslanî rayra şîyî bû tîya marşê “Çerxa Şoreşê” wend û rêz girewt. Dima ra eşkerayîye ameye dayene.

Hemserekê HDPyî yê Erziromî Muhammer Dumanî vera caardişanê vera cenazayan nêrazîbîyayîş mojna û vat: ‘’Keyeyê şehîdan têna nîyê. Êyê ke hesab kitab kenê wa verî şarê kurdî bivînê. Gama ke dewlete raya verêne cenazaya ma pê kargoyî daye eke ma wina bikerdêne cenazayê ma yê bînî pê tewreyan nêameyêne dayene. Şarê kurdî do wayîrê cenazayanê xo bivejîyo. Şarê kurdî yew o, pîya yo.’’

Hemsereka MEBYA-DERî  Hanime Kaya zî vist vîrî ke cenazayê kurdan pê kargo û tewreyan teslîmê merdimanê înan benê û vat: ‘’Hetê bînî ra hêrişê mezelanê ma kenê. Dayîkê ma raştê nê şerê psîkolojîkî yenê. Şarê kurdî vera nê hêrişan cayê dayîkan de yo.’’

Serekwekîla Koma HDPyî Merale Daniş Beştaş zî vat: ‘’Şarê kurdî sey vizêrî ewro zî wayîrê dewa, ziwan û kulturê xo vejîyeno. Ma hema zî cayê  mezelanê Şêx Seîd û Seyîd Rizayî nêzanî la şarê kurdî înan ciwîyeno. Cenaza badê 7 serran zereyê tewreyî de ameye dayene ke no eziyet o, vera merdimîye sûc o. Gama ke qala kurdan bena êyêke qala heqanê merdiman û demokrasîyî kenê pêro benê bêveng. Cayo ke mezelê ma tede yê uca herre û welatê ma yo. Ma do sey HDPyî tim wayîrê mezelan û merdayanê xo vejîyê.’’

Hemserekê KCDyî Berdan Ozturkî zî vat: ‘’Tarîxê merdimîye de vera cenazayan hêriş çîn o. Wextê kabîleyan de zî cenazayan rê îşkene û zulm nêameyêne kerdene.  No zî mojneno ke dewleta tirke zulm û bêwîjdanîye de sînor nas nêkena û heme zalimanê tarîxî zafêr zalim a. Qet yew îtîqatî de cenazayan rê hêriş nêbeno, cenazayan rê tim hurmet yeno kerdene. 90yan ra nata dewleta tirke pê cenazayanê ma kay kena. Şarê kurdî vera nê hêrişan do çirey milê xo çewt nêkero û tim wayîrê ercanê xo vejîyo. Ma do têkoşîn û xoverdayîşê azadîye xurtêr bikerê.’’