Şarê Mexmûrî pê destanê xo hendekan keno de

Artêşa Iraqî saetanê serê sibayî ra derûdorê Kampa Mexmûrî de dest kendişê hendekan kerd. Şarê kampe ke vera ablûqa xover dano, pê destanê xo hendekan keno de.

Artêşa Iraqî saetanê serê sibayî ra derûdorê Kampa Mexmûrî de dest kendişê hendekan kerd. Şarê kampe ke vera ablûqa xover dano, pê destanê xo hendekan keno de. 

Rixmê muzakerayanê panc rojan  artêş Iraqî roja şeşine de saetanê serê sibayî de cayanê stratejîkan ê derûdorê kampe de xo ca kerd û dest pê kendişê hendekan kerd. Artêşa Iraqî kena ke derûdorê kampe pê têlan bîgêro û kuleyanê leşkerîya rono. Şarê kampe zî vera nê xover dano û vano ê do destûrê girewtişî medê.

Endamê Komîteya Dîplomasî yê Mexmûrî Seîd Çomlekî vat, “Artêşa Iraqî nişka cedh kerd ke kampe bîgêro binê ablûqa la tewirê şarî vera nê zaf xurt o. Ma pêvînayîşanê xo de zî vat ma do têlan û kuleyan qebul mekerê. Ma zanê ke nê pê destê Tirkîya û PDKyî yenê kerdene. Ma do înan çirey qebul mekerê. Şar xora vera nê wirişto payan ser, xover dano. Selahîyetdaranê Iraqî pêvînayîşan de soz da ke do peyser agêrê la sozê xo nêtepişt. Hukmatê Iraqî wazeno waştişanê Tirkîya bîyaro ca. Ma nê qebul nêkenê.  Ma wazenê probeman bi rayîrê dîyalogî çareser bikerê. 

Heta ewro mabênê şarê Mexmûrî û Iraqî çîyo winayên nêqewimîyayo. Raya verêne ka wina yew çîn beno. Eke ewro têlî û kuleyî bêrê kerdene siba waştişê Tirkîya zafêr benê. Destê ma de teberê xoverdayîşî de yewna çî çîn o. Gerek ma hîşyar bê. Ewro reyna dest pê hendekan kerd. Şarê ma wirişt payan ser. Dayîkan pê destanê xo hendekî kerdî de. Çunke destê şarê ma de yewna çî çîn o. Destanê xo şuxulneno. No semedê şarê ma yew mesaj o. Vera ma bêhurmetîye yena kerdene. Êyê ke sûcdar ê û tehdît kenê derûdorê înan de hendekî yenê kendene. Ma wazenê fam bikerê, ê qey derûdorê ma de hendekan kenenê. Şarê ma pê destanê xo nê hendekan keno de. Ma do bi heme hêzê xo hendekan red bikerê.”