Hemsereka HDPyî ya Wanî Handane Karakoyun û Îdarekara MEBYA-DERî ya Wanî Ceyda Dîndar derheqê weçînayîşanê 14ê gulane de ANFyî rê qisey kerd.

Handane Karakoyun da zanayene ke Wan de atmosferê weçînayîşî dest pê bîyo û vat: ''Hem dezgehê ma yê cinîyan hem zî cinîyî bi xo xebatanê weçînayîşî kenê. Ma hem zîyaretanê xo kenê, hem zî kombîyayîşanê xo. Wan ê şaristananê Kurdîstanî ra yew o ke hedefê tedayanê dewleta tirke de yo. Di reyî qeyûm ame tayînkerdene serê Wanî. Şarê Wanî hem vera tecrîdî hem zî vera polîtîkayanê qirkerdişî hêrsbîyaye yo. Rixmê pêro tedayan zî şarê Wanî Newroze de îradeyê xo mojna, seba azadîya Abdullah Ocalanî qîra. Nê weçînayîşan de zî şarê Wanî do wayîrê îradeyê xo vejîyo. Ma hê Partîya Çep a Keske reyde kewenê weçînayîşan. Amadekarîyê ma dewam kenê.''

Îdarekara MEBYA-DERî ya Wanî Ceyda Dîndar ard ziwan ke nê weçînayîşan de rayê cinîyan do her çî dîyar bikerê. Dîndare vat: ''Tirkîya de wextê peyênî de Peymana Îstanbulî ameye betalkerdene, cinîyî yenê qirkerdene û nasnameyê cinîyan çin hesibîyenê. Ma prosesê nê weçînayîşan de cinîyan reyde kuçe bi kuçe gêrenê û faşîzmê AKP-MHPyî do birejnê. Ma pê bawer ê ke 14ê gulane de sey cinîyan û şarê kurdî pê rengê xo Tirkîya newe ra înşa bikerê û cewabê îqtîdarî bidê.''