Hemserekanê Partîya Çepe ya Hewze yê Amedî Abbas Şahîn û Pinare Tekîn derheqê weçînayîşan û reaksîyonê şarî de ANFyî rê qisey kerd. 

Abbas Şahînî da zanayene ke partîya înan 2012 de ronîyaya la newe newe bena aktîf û vat: ''Wexto ke ma vejîyayî verê şarî, şarê ma nameyê ma ra zana ke ma senîn ê. Ma tedaya vera sîyasetê kurdan hol zanayêne coka ma tedbîrê xo girewt. Şarê ma zî cade ma qebul kerdî. Şarê kurdî şarêko polîtîk o. Polîtîk o çunke zaf dîyo û anto.

Partîya ma ekolojîk a, têdûştîya cînsîyan, azadîye û demokrasî pawena. Coka şarê ma, ma verî de xerîbîye nêante. Şarê ma zanayêne ke o do tercîhêkê biaqîlî bikero. Her kes perseno ke nê di aşman de senî ma do xo bidê şinasnayene. La şarê ma hol zaneno ke raya xo bido kamî. Sîstem zî ney hol zaneno coka tim metodanê neweyan sey astengîye ceribneno. La şarê ma cade adapteyê çîyanê neweyan beno.''

Hemsereke Pinare Tekîn ard ziwan ke şarê kurdî hetê tercîhanê xo ra net o û vat: ''Xora ma kuçeyan de do şarê xo reyde bibê, şorê taxan û dewan. Ma do her ca de dest bidê destê şarê xo û nê faşîzmê 100 serrî pîya birijnê. Bi taybetî cinîyî zaf eleqe mojnenê partîya ma Çunke ma wayîrê heman qesawetan ê. Cinîyî her cayê dinya de çin hesibîyenê. Partîya ma vera nê çîyî têkoşîn kena. Ma sey cinîyan yewbînan ra hêz gênê û ameyoxê ma yew o. Seba ke cinîyî her ca de bibê wayîrê vateyêkî ma têkoşînê xo kenê pîlêr. Çunke komel pê cinîyan beno rind. Ewro şîarê 'Jin, Jiyan, Azadî' pêro dinya de eşnawîyeno û cayêkê girîngî de vindeno.''