Endamê Îdareyê Asayîşê Êzîdxanî Şêrzad Şemo vizêr Nêweşxaneyê Şehîdanê Xanesorî ra bi karwanêkê wesayîtan ver bi Şehîdgehê Ş. Berxwedan û Ş. Dilgeşî ame oxirkerdene. Bi des hezaran cinî, doman û kal beşdarê merasîmê şehîdî bîyê.

Bi nameyê Îdareyê Asayîşê Êzîdxanî Dîndar Şengalî qisey kerd û vat; ‘‘Ma sere de keye û hemrayanê Şêrzad Şemoyî rê serweşî wazenê û vanê wa sereyê ma pêroyînan weş bo’’

Şengalî bale ante têkoşîn û xoverdayîşê Şehîd Şemoyî ser o û vat, ‘‘Hemrayê ma Şêrzad serra 2007î de rêxistine şinasnaye, a roje ra heta ke şehîd bi, heme wezîfeyanê xo bê ke teredut bikero kerd û mîyanê hem sazgehan ra xebitîya. Her tim hayîya ey bi berpirsyarîyanê ey ra est bî.’’

Şengalî bale ante têkoşînê vera DAÎŞî ser o û vat: ‘‘Serra 2014î ra heta nika xeylê şerwanê ma yê serkêşî bi qehremanî vera çeteyanê DAÎŞî şer kerd. Dewleta tirke ya îşxalkere waşt ke heyfê birayê xo bigîra. Coka hêrîşê fermandaranê ma kena.’’

Nameyê Rayberîya Xosere zî Cagirê Hemserokê Desteyê Rayber ê Şingalî Azad Hisen qisey kerd û vat, ‘‘Şehsê Fermandar Pîr Çeko, Agir Cefrî û Şerzad Şemoyî ma heme şehîdanê xo anê xo vîrî û bihurmet yad kenê. Ma heme şarê xo rê serweşîye wazenê. Beno ke ma ney ra giranêr berdelan zî bidê, seba ke ma şerê xo rê sozêk dayo ke se bibo zî ma do sozê xo ra fek nêverdê.’’

Nameyê Keyeyê Şehîdan ser o zî Hemed Bişarî wina qisey kerd; ‘‘Ma her kesî rê sipas kenê ke tîya der ê, seba nê şehîdanê xo seba şehîdê azadîye keyeyanê înan rê serweşîye wazenê û vanê ke ma bi şehîdanê xo est ê. Se bibo zî ma sereyê xo dişmenî ver o nêronenê û vera hêrîşanê înan ma do xover bidê.’’

Qiseykerdişan ra dima bi slogananê ‘Şehîdî Nêmirenê’ şehîd ame definkerdene.