Gerîla Xebat Kop û Zana Rojda 7ê êlula 2022yî de herêma Omerya ya Mêrdînî de hêrişê dewleta tirke de şehîd bibî. Înan rayîrê şehadetî de 'hacetê qeydkerdişî' akerd û mesajê xo da pêro dinya.

Şewa 4ê êlule de nê çêranê Kurdîstanî vera dişmenê îşxalkerî bi fedayîtî şer kerd, derbê giranî nêzdî ra da dişmenî ro û xeylêk îşxalkerî ceza kerdî. Dewleta îşxalkere naye ser o 5ê êlule de herêma Omerya de operasyonêko hîra da destpêkerdene û di rojan herême bi giranî girewte binê ablûqayêka girane. Dewleta îşxalkere Omerya pê 6 teyarayanê şerî û 2 helîkopteranê hêrişî daye bombayan ver, dima zî kerd ke pê kepçeyan mewzîyanê gerîlayan birijna. 

Wextê nê şerê giranî de gerîla Xebatî hacetê qeydan akerd û vat: ''Ma do dişmenî tîya de bifatisnê.'' 

Dima Zanayî vat: ''Şewe saete 9.20 de, ma dewa Serê Kanî ya Omerya de dişmenî de kewtî şerêkî. Ma mewzîyanê xo de yê. Ma şer kenê û xo ver danê.''

Nê hêlan de vengê Xebatî berz beno û sey Kemal û Xeyriyan, sey Mazlûman vano: ''Berxwedan jiyan e." 

Zana bi dewamî vano: ''Ma bi moral û coşî yê. Eke rojêke vengê ma bireso embazan, wa ê bizanê ke ma mîyanê xoverdayîşî de yê. Ma do nêeşkê tîya ra vejîyê. Ma do heta guleyê xo yê peyênî şer bikerê. Ma pê partîya xo bawer ê. Nika netîceya derbanê ma de dişmen rema û hewayî ra hêrişê ma keno. Bi metodanê cîyayan ma cewabê dişmenî danê.''

Nika saete 1.16 o, dişmen 12.50 de ame mewzîyanê ma. Ma hacet û malzemeyê xo seba ke nêkewê destê dişmenî vêşnayî. Eke ma îmkan virazê do tîya ra vejîyê la do nêverdê dişmen pê tepiştişê ma kêfweş bibo. Dişmen veng dano ke ma teslîm bibê. Ma sey cewabî bomba eşte. Mabênê ma û dişmenî de şerêko çetin qewimîyeno. Ma qerardar ê ke heta peyênî şer bikerê. Beno ke ma şehîd binê. La partîya ma peynî de do ser bikewa. Bijî Serok Apo, Bijî Serok Apo, Bijî Serok Apo.''

Zanayî ra dima gerîla Xebat wina mesajê xo dano: ''Wextêkê dergî ra nata ma mîyanê PKKyî de yê. Beno ke kêmasîyê ma, qelsîyê ma est bîyê. Ma nêeşkayî bibê cewabê şehîdan. Eke ma kêm nêmendêne dişmen hende nêeşkayêne bi rehetî Kurdîstanî îşxal bikero û venga ma bikero. Ma ney qebul nêkenê. Teslîmîyet qetî nêbîyo rayîrê ma. Heta deqayê peyênî, hela peyêne ma do xo ver bidê, şer bikerê. Rayîrê ma rayîrê Zîlane, Kemal û Mazlûmî yo û ma do nê rayîrî ra apey game nêerzê. 

Ez pêro embazan rê serkewtiş wazena. Ma pê partîya xo bawer ê. Ma pêro embazan rê heskerdişê xo pêşkêş kenê. Babeta têkoşînê cînsîyî de mîyanê cuye de embazan reyde ma zaf reyî nîqaş kerdbî. Na raştîyêka 'Jin, Jiyan, Azadî' ya. Naye ser o ez pêro embazan, Serekîye, embazanê îdareyê partî selam kena. Alaya partîye qetî do nêkewa war, tim do berz biba. Xoverdayîşê PKKyî do tim asta tewr berze de bibo. Bijî Serok Apo, Bijî Serok Apo, Şehîd namirin!"