Fermandaranê HPGyî ra Fazil Şevgerî bi wesîleya serrgêra 40ine ya Hemleya 15ê Tebaxe ANFyî rê qisey kerd.

Qiseykerdişê Şevgerî ra tay noqtayê girîngî wina yê:

''Hemleya 15ê Tebaxe ra verî kurdî raştê hêrişanê giranan ameyêne. Dewlete o çax vatêne 'Ma kurdî kiştî zî defin zî kerdî.' Wextê winayênî de Rayber Apoyî têkoşîn da destpêkerdene û têgêrayîş na ro. Na rêxistinîya ciwanan bîye pîlêr. Dewlete nê ciwanî sey tehlukeyanê pîlan dîyî û bi Darbeya 12ê Êlule kerd ke têgêrayîşê nê ciwanan tasfîye bikera. Vera ney yew rayîr mendbi; têkoşîno çekdar. Darbeya 12ê Êlule reyde kadroyê serkêşî tepişîyayî. Rayber Apoyî zî teberê welatî ra têkoşîn rêxistin kerdêne. Rixmê hêrişanê dişmenî Xoverdayîşê Zîndanê Amedî ser kewtbi. Nê xoverdayîşî cesaretêko pîl da şarê kurdî. Hemleya 15ê Tebaxe wextêkê winayênî de amebî îlankerdene ke dişmenî vatêne qey PKK tasfîye kerdo. 

Komêka embazan amadekarîyêka pîle ra dima 15ê tebaxa 1984î de Dihê û Şemzînan de çalakîyî kerdî û HRK îlan kerd. Hemleya 15ê Tebaxe hem vera dişmenî hem zî vera hemkaranê xayînan ameya îlankerdene. Kurdan a roje pêro zincîrê xo şikitî eştî. 

Dihê de dişmen şoq bibi. Dişmenî vatêne qey mîyanê 72 saetan de do PKKyî çin bikero. La têgêrayîşo Apogîr nêmendêne têgêrayîşanê kurdan ê bînan. Têgêrayîşî hêvîyêka zixme dekerde zerrîya kurdan. Hemleya 15ê Tebaxe seba kurdan bi destpêkêko tarîxî. Têgêrayîşê ma her ke şi bi pîlêr û ewro ma dekewenê serrgêra 40ine ya Hemleya 15ê Tebaxe. 

Hemleya 15ê Tebaxe hemkar û xayînî zî tersnayî. Xayînan bi taybetî PDKyî kerd ke têgêrayîşê  ma asteng bikero. Xora şerê gerîlayan zî o çax şerêko newe bi.  La ciwanan bê teredutî verê xo da koyan.

Heyf ke ewro xeta xayînîye serkêşîya PDK û keyeyê Barzanîyan de dewam kena. Rayber Apoyî hema destpêk de venga PDKyî dabi ke ma yew bibê û vera dişmenî pîya têkoşîn bikerê. La PDKyî xeta îxanetî ra fek vera nêda.

Gerîlayî bi taybetî 2015 ra nata şerêkê çetinî kenê. Ma seba rûmet û şerefê şarê xo şer kenê. 9 serrî yo îqtîdarê AKP-MHPyî û dewleta tirke verê ma de bin kewenê. Dişmen keno ke bi PDK û DAÎŞî netîce bigêro. PDKyî ra nêbîyêne dewleta tirke rew ra do bin bikewtêne. Heyf ke PDK bîyo parçeyêkê hêrişanê dewleta tirke. 

Hayîya gerîlayan bi mîsyon û vîzyonanê xo est a. Gerîlayî zanenê ke eke ê bin bikewê şarê ma do bêro qirkerdene. Coka ganî ciwanê ma vera hêrişanê dişmenî û tecrîdê serê Rayberîye verê xo bidê koyan.

Ma sey şerwananê Rayber Apoyî se beno wa bibo şoriş awan bikerê û Rayber Apoyî reyde erdê azadî de biciwîyê. Nê esasî ser o ez Hemleya 15ê Tebaxe fîraz kena û pêro şehîdanê Kurdîstanî yad kena.''