Şingal de, Baxçeyê Serok Apoyî yê Gelîya Kersî de Roşanê Çarşema Sor ame fîrazkerdene. Şayîya ke serkêşîya Merkezê Kultur û Hunerî yê Şingalî de virazîyaya, bi hezaran kesî beşdarê ci bîyî.

Şayîye de verî mesajê Endama Konseya Serekîya Pêroyî ya KCKyî Sozdare Avesta ame wendene. Avesta mesajê xo de pare kerd ke komelê êzidîyan bi fikranê Rayberê Şarê Kurdî werişto we.

Hemsereka Heyetê Rayberdişî yê Şingalî Rihame Hesen zî Çarşema Sor a Abdullah Ocalanî û pêro şehîdanê Fermanê 74î fîraz kerd. Rihame Hisêne bale ante ser ke komelê êzidîyan ê Efrînî raştê teda û hêrişanê dewleta tirke yeno û nêeşkeno roşanê xo fîraz bikero. Rihame vat: ''Êzidîyî ganî her ca de xo rêxistin bikerê. Seba ke komelê ma hînî raştê fermanan nêro ganî ma xoserîya xo bivisnê destî. Sîstemê Neteweya Demokratîke ra ber qet yew rayîrê ma çin o.''

Vervatoxa Koordînasyonê Komelê Êzidîyan ê Ewropa Çîçeke Yildiz zî Çarşema Sor a pêro şerwanan û şehîdan fîraz kerde.

Qiseykerdişan ra dima şayîye bi deyîr û govendan dewam kerd. Şayîye de Koma Dengbêjên Şengalê, Hunermend Bager Medî, Koma Zarokan a Şehîd Zerdeşt, Hunermend Bişar, Hesen Emo û Yaser Şengalî vejîyayî sehne ser û deyîrî vatî. Heta saetanê şewe zî govende ameye girewtene.