HDPyî wextêkî verî pare kerdbi ke Partîya Çep a Keske (YSP) reyde do bikewo weçînayîşan. La seba ke YSP reya verêne keweno weçînayîşan û hema awbend derbaz nêkerdo nêeşkeno sindoqan de wezîfedar bixebitno. Hetê bînî ra derheqê asayîşê sindoqanê herêmanê erdlerzî de qesawetî zêdîyenê.

Endamê Meclîsê Partîye yê HDPyî Mustafa Akengîno ke Karanê Weçînayîşî ra Berpirsîyr o, derheqê babete de ANFyî rê qisey kerd.

Akengînî da zanayene ke YSKyî 60 wezîfedarî şawitê Mereş, Elbîstan, Dîlok û Semsûrî û bernameyê tedbîranê xo zî eşkera kerdo. Akengînî pare kerd ke ganî weçînayîşan ra verî amadekarîyî biqedê û vat: ''Nê wezîfeyê YSKyî yê. Wezîfeyê ma zî no yo ke mexdûrê erdlerzî yê ke şîyê şaristananê bînan, ma nînan agahdar bikerê. Ganî bêro zelalkerdene ke herêmanê erdlerzî de weçînitoxî kamca de do raya xo bidê. Eke weçînitoxan raya xo kiriştê zî raya înan cayanê înan ê neweyan de do bêra hesibnayene. Yanî mîsal eke weçînitoxê Semsûrî şîyê cayêkê bînî zî hûmara wekîlan do kêm nêba. Raşta zî verê ma de prosesêko zehmet est o. La ganî YSK nê wezîfeyanê xo bîyaro ca.''

Akengînî vist vîrî ke Partîya Çep a Keske nêeşkena sindoqan de çewî wezîfedar bikera û vat: ''Ma Amed de xebata weçînayîşî kenê. Tîya de 31 hezar sindoqî est ê. Ma teyna eşkenê sindoqan rê temsîlkaran bişawê. Ganî şarê ma roja weçînayîşan de sindoqanê xo terk nêkero û heta peynî sindoqan bipawo. Ma kenê ke herême de raya xo bikerê se ra 70-80. Weçînitoxî eşkenê serê sindoqan de hûmaritişê rayan teqîb bikerê. Eke sixletîye biqewimîya sereka/ê sindoqe eşkena/o teyna sey seykeran destûr bida/o yew-di tenan. La ganî ma heta roja bîne baxçeyê dibistane de, kuçeyan de bimanê.''

Akengînî îfade kerd ke awbend seba ke kurdi nekewê Meclîsî ameyo ardene û vat: ''2015 de ma sînorê awbendî yê se ra 10î bi asanî derbaz kerd. La xîretê Darbeya 15ê Temmuze ra dima sîstemê serekîye ra seba kurdan sînor bîyo se ra 50. Hedefê ma no yo ke ma se ra 50 sînorê awbendî derbaz bikerê.''