Fermandaranê YJA-Starî ra Ferîde Alkan bernameyê taybetî yê Stêrk TVyî de bira çalakînêkerdişî û weçînayîşê 14ê gulane ercnayî.

Qiseykerdişê Alkane ra tay noqtayê girîngî wina yê:

''Ma bire dabî ke heta weçînayîşan çalakîyêke nêkerê la rixmê ney zî dewleta tirke bêmabên hêrişanê xo rê dewam kerd. Embazê ma çarçewa xopawitişî de cewab danê nê hêrişan. Bagok, Amed û Besta de na çarçewe de xeylêk leşkerê dişmenî ameyî cezakerdene. Ma goreyê bira çalakînêkerdişî têgêrenê, heta ke dişmen nêro serê ma, ma hêriş nêkenê. Xora Bagok, Amed, Besta û Serhad de zî wina bi.

Weçînayîşanê 14ê gulane de şarê ma Kurdîstan de faşîzm bin vist û Erdoganî kerd binê erdî. Bi taybetî şaristanan Colemêrg, Amed, Mêrdîn, Şirnex, Êlih û Bedlîsî faşîzm red kerd. Reyna ê cayê ke şarê ma tede koçber ê, Erdoganî tede raye tay girewte. Sey gerîlayanê azadîye no tewirê şarê ma, ma rê sey talîmat o. Ma do nê tewirê şarê xo bivurnê serfîrazîye.

Şarê Kurdîstanî prosesê weçînayîşî de reyna raştê operasyonanê qirkerdişê sîyasîyî ame. Rixmê hêriş û kayanê xo zî AKP-MHP Kurdîstan de bin kewt. Derdê şarê kurdî o nîyo ke Kiliçdarogluyî bikero serekkomar. Tarîxê CHPyî û raştîya Kiliçdarogluyî zanîyenê. Kurdî wazenê faşîzmî bin bivisnê. Erdogan 22 serrî yo armanc keno ke şarê kurdî û têgêrayîşê azadîye tasfîye bikero. Coka şarê ma Erdoganî nêwazeno û dûştê ci de cagêno.

Ez naye zî vaja ke têkoşînê ma bi weçînayîşan dest pênêkerd coka bi weçînayîşan zî do nêqedo. Xora weçînayîşî girîng ê. La ganî têkoşîn bi hawayêkê topyekûnî bêro kerdene. Ganî têkoşîn bingeyê Kurdîstanê Azadî, şiknayîşê tecrîdî û azadîya Ocalanî de bêro kerdene. Ma pê bawer ê ke şarê ma yo rêxistinkerde turê diyînî de seba binvistişê faşîzm û dîktatorîya Erdoganî aktîf bibo. Bi na wesîle ez şarê ma rê serkewtiş wazena.''