Komeleya Cigêrayîşanê Kultur û Ziwanî yê Mezopotaymya (MED-DER) û Komeleya Edebîyatkaranê Kurdan bi wesîleya 21ê Sibate Roja Ziwanê Dayîke ya Dinya Yenîşehîrê Amedî de şayîye organîze kerde. Wekîlê HDPyî,  îdarekarê  DBP, TJA, KKPyî û Mayê Haştîye, temsîlkarê rêxistinanê komelê sîvîlî û ziwanî ya pîya xeylêk kesî tewrê şayîye bîye. Heyatê şayîye de pê pankartan bale ameye antene muhîmîya ziwanê dayîke ser û cinî û domanî pê kincanê xo yê neteweyî tewrê şayîye bîyî. Xeylêk wext pê deyîranê kurdkî gonvende ameye girewtene.

Hemserekê MED-DER Rifat Ronîyî vat: ''Her çiqas na cografya de hesir û gonî bibî zî ma vera hêrişanê vera ziwanê kurdkî aktîvîteyan kenê. Ganî ziwanê kurdkî bibo ziwanê perwerdeyî yo fermî. Tirkîya de pê TRT 6î kurdkî kenê bêqiymet. Hetê bînî ra dersê vîjnayeyî fînayî rojdem. No muhîm o la qîm nêkeno. Domanî ganî bi ziwanê dest pê dibistanî bikerê, perwerde bigerê. Eke dersê vîjnayeyî semedê xerîban yenê dayene ma nê qebul nêkenê. Çunke şarê kurdî şaro tewr tewr kahan  û wayîrê nê welatî yo. Xeylêk kesan seba ke kurdkî qisey kerd ameyî qetilkerdene.  Tewr peynî de Sakarya û Konya de vera kurdan senî hêrişî ameyî kerdene.''

Dima ra Hemsereka Pêroyî ya DBPyî Salîha Aydenîz qisey kerd. Aydenîze ard ziwan ke ziwan nasnameyo û vat:  ''Ziwan ruh o. Eke ruhê yew netewî çîn o, qet çîkê ci çîn o. Coka ganî ma wayîrê ruhê vejîyê.  Seke yeno zanayene seba ke kurdkî bibo ziwanê dayîke zaf têkoşîn ame kerdene. Ziwan ganî têna yew roje nêro vîrardene .Senî ke Îpeke Ateş vatene 'Kamber Ateş nasilsin' (Kamber Ateş ti senînî)  ewro zî polîtîkayê ê rojan dewam kenê. Se beno wa bibo ma çîn hesibnayîşî qebul nêkenê. Semedê ruskî û îngîlîzkî bi seyan malimî yenê tayînkerdene la semedê kurdkî hîrê malîmî tayîn kerdî. Tîya ra eseno ke nizdîbîyayîşê înan ê vera kurdkî senîno. Ma na dirîtîye qebul nêkenê. Wazenê ke ziwanê dayîke çîn bikerê. Seba ke nêeşkayî çîn bikerê narey kenê ke lehçeyanê ci cîya bikerê ke yewbînan ra raqilnê. La ziwanê kurdkî yew o, ma do destur mede bêro parçekerdene. Ma do têkoşînê ziwane rê dewam bikerê.''

Dayîka Haştîye Kudret Erzîndane  zî vat: ''Ganî her dayîke wayîrê ziwanê xo vejîyo û ziwanê xo domananê xo rê bimusno. Ma semedê nê ziwanî zaf şehîdî dayî. Ma do wayîrê erjanê xo vejîyê.'' Reyna bi nameyê komelayanê bînan zî qiseykerdişî ameyî kerdene û dima şayîye bi kayanê tîyatroyî û şîîranê kurdkî dewam kerd. Badê goştarîkerdişê şîîran MEB-DERî sertîfîkayê perwerdeyî dayî wendekaran. Şayîye bi deyîranê grûba muzîkî ya Komeleya Huner û Kulturî ya Dicle qedîyaye.