Anter Dêrsimê ke 11ê teşrîna peyêne de netîceya krîzê qelbî Rojawan de dinyaya xo bedilnaye bi merasîmêkê xurtî Qamişlo de ame definkerdene.

Kurd, ereb û suryanîyan ra bi hezaran kesî semedê tewrbîyayîşê merasîmî Qamişlo de ameyî têhet. Endamê Îdareyê Xoserîya Demokratîke yê Herême Cizîre, MSD û partîyê sîyasîyî yê Rajawanî zî merîsîm de amade bî. Şaro ke taxa Eterîyê de ame têhet cenazaya Anter Dêrsimî girewt û ver bi Şehîdgehê Şehîd Delîl Saroxanî raya şi. Cenaza Şehîdgeh de bi slogananê ''Şehîdî Nêmirenî'' tîlîlîyan ameye verwazîkerdene.

Badê rêzgirewtişî Endamê Meclîsê Keyeyanê Şehîdan Hisên Ibêdî keyeyê şehîdî û şaranê Rojawanî rê serweşîye waşte û vat do têkoşînê şehîdan bêro pîlêrkerdene. Hemsereka TEV-DEMî Zelale Ceger zî vat: ''Anter Dêrsimî hela destpêkerdişê şorişê Kurdîstanî ra  ata tim qerardar mîyanê têkoşînî de cayê xo girewt. Seba ke semedê keyeyê xo yê pîlî têkoşîn bikero keyeyê xo yo qij xo dima verda. Ê tim vatêne heta ke welat azad nêbo keyeyo cij zî nêeşkeno bibo azad. Rixmê  rewşa xirab a weşîya ci têkoşînê xo domna. Heta azadîya Kurdîstan û Rayber Abdullah Ocalanî ma do rayîrê Anter Dêrsimî ra şirê.''

Endamê Meclîsê Keyeyê Şehîdan Rivîn Şêxmusî zanayîşê derheqê nasnameyê şehîdî wendî û teslîmê keyeyê ci kerd û dima ra Anter Dêrsim bi sloganan û tîlîlîyan ame definkerdene.