Erdlerzê 6ê Sibate de goreyê doneyanê fermîyan 50 hezar û goreyê çimeyanê herêmîyan zî 100 hezar kesî şîyî rehm, bi desan şaristanî wêran bîyî. Têgêrayîşê sîyasî yê kurdî ke binê sîwana Partîya Çep a Keske de kewenê weçînayîşan, bi taybetî giranî danê herêmanê erdlerzî.

Hemsereka HDPyî ya Amedî Gulîstane Atasoy derheqê tesîrê erdlerzî yê serê weçînayîşan de ANFyî rê qisey kerd. 

Atasoye îfade kerd ke erdlerzî ra verî cara Tirkîya de krîzêko giran est bîyo û erdlerzî sîstemê kapîtalîzmî, sîstemo cîyaker û nêzdîbîyayîşê îqtîdarî bi zelalêrî eşkera kerdê. Atasoye da zanayene ke hûmarê wefatan ê raştikênî 50 hezar ra zêdeyêr ê û vat: ''Erdlerz de cînayetî qewimîyayî. Bi hezaran cenazayî nêameyî dîyene, hetkarîye erey resaye. Ma erdlerz de hetê menfaetî yê sîstemî dîyê. Ma sîstemê faşîstî reyde têrî mendî. Teyna kurdî nê hînî pêro şarê Tirkîya ameyoxêkê azadî û demokratîkî wazenê. Seba nê ameyoxî ganî ma bi meseleyan meşgul bibê.''

Atasoye ard ziwan ke seba  ke sîyasetê kurdî bi pêro mekanîzma û dezgehanê xo prosesê erdlerzî de hetê şarî de bîyo, no hişmendîyêka zaf girînge afernaye. Atasoye vat: ''Têkilî û paştdayîş ê ke ma wextê erdlerzî de kerdê, bêguman do vurnayîş û vurîyayîşan xo de bîyarê. Şaranê Tirkîya de nika persayîşêko komelkî est o. No persayîş mojneno ke ma tewr zaf hewceyê haştî û demokrasî yê. Ma qerardar ê ke bi hawayêkê xurtî wayîrê yewbînan vejîyê. Ma heta nika zaf bedelî dayî. La ma zanenê ke na qerardarî, no têkoşîno heqdar do serkewtişî bîyarê.''