Zîndananê Tirkîya û Kurdîstanî ra her roje agahîyê serê îşkence û mergî yenê. Tepişteyê sîyasîyî vera ney xeylêk zîndanan de dest pê grevê vêşanîye kenê. Zîndananê Wan, Kurkçuler û Beşîkduzuyî de grevê vêşanîye dewam kenê. Zîndanê Kiriklarî yê Îzmîrî de zî 3 tepişteyanê sîyasîyan dest pê grevê vêşanîye kerd.

Hemsereka TUHAY-DERî ya Wanî Edîbe Babur derheqê rewşa zîndanan de ANFyî rê qisey kerd û ard ziwan ke waştişê tepişteyan waştişê merdimîye yê û ganî bêrê caardene.

Edîbe Babûr ard ziwan ke Zîndanê Wan, Kurkçuler, Beşîkduzu û Kiriklarî de şert û mercî vera benê xirabêr û vat: ''Gardîyanî, îdarekarî her roje zulmî kenê giranêr. Tepişteyê nêweşî nêbenê doktor. Zîndanê Wanî de Makbule Ozera 80 serre tepişîyena, doktor raporê 'nêeşkena zîndan de bimana' danê ci la îdareyê zîndanî aye vera nêdano. Wexto ke kurdî benê babete huqûq nêno caardene. Hafîfe Acara ke Zîndanê Wanî de tepişîyena, pê kelemçe yena berdena bi doktorî. Ma venga Wezîrîya Edaletî danê ke şert û mercanê zîndanan wa weş bikerê, tepişteyê nêweşî wa cade bêrê dermankerdene.''

Edîbe Babur pare kerd ke goreyê vateyanê keyeyan zîndanan de kerdişê xirabî est ê û vat: ''Nê dewrî de no çi şermêka pîl a. Ganî cade peynîya na bêhuqûqîye bêra ardene. Dewleta ke merdiman tepişnena, cuya nînan ra zî mesuldar a.''