Qezaya Farqînî ya Amedî de 6ê hezîrane de M.K.yê 16 serrî edlîye de raştê îşkenceyê polîsan ame. Tîya de destê domanî pey ra ameyî kelemçekerdene û doman ame destbendkerdene. 

Baroyê Amedî îşkenceyê domanî ra gerreyê polîsan kerd. Baroyê Amedî gerrenameyê xo de pare kerd ke doman dima ke amebi destbendkerdene 7ê hezîrane de ameyo berdene bi Mudirîya Polîsan, Dozgerîya Komare ya Farqînî de bi waştişê tepiştişî sewqê mehkeme bîyo û Mehkemeya Ceza ya Farqînî de tepişîyayo. Baroyî vat: ''Dîmenî est ê ke doman edlîye de raştê îşkenceyî ameyo. Rixmê îtîrazan de doman bi hawayêkê kelemçekerdeyî wesayîtê polîsan de ameyo siwarkerdene.''

Waştişname de ame îfadekerdene ke doman sibata 2023yî de zî bi hawayêkê destbendkerdeyî Nêweşxaneyê Dewlete yê Farqînî de raştê îşkenceyê polîsan ameyo.

Baroyî waşt ke wa polîsî bêrê cezakerdene.