Baroyê Colemêrgî derheqê îşkenceyê polîsan ê Geverî de eşkerayîyêke daye û waşt ke vera îşkenceyî tehqîqatêko xurt bêro kerdene.

Baroyî eşkerayîye de pare kerd ke Mustafa Boro ke pa ciwananê bînan îşkence dîyo înan rê qisey kerdo û beyanê ey ameyê qeydkerdene. Baroyî veng da ke wa derheqê mesuldaranê îşkenceyî de tehqîqatêko bitesîr bêro kerdene.

Baroyî îfade kerd ke îşkence vera rûmetê merdimatîye yo û nêno qebulkerdene. Baroyî vat: ''Sûcdarîya derheqê înan de se beno wa bibo çew nêeşkeno înan rê îşkence bikero. Ganî cade derheqê selahîyetdaranê îşkencekeran de çîyo hewce bêro kerdene. Ma meqamanê muhakemekerdişî ra wazenê ke vera îşkence, kerdişanê xiraban û tedayan tehqîqatêkê xurtî û lezî bikerê; sûcdaran ceza bikerê. Ma do nê prosesê huqûqîyî teqîb bikerê.''