Hemserekê Konseya Rayberdişî ya KCKyî Cemil Bayikî bi wesîleya serrgêra Komployê Mîyanneteweyîyî yê vera Rayberê Şarê Kurdî Abdullah Ocalanî yo ke 9ê teşrîna verên a 1998î de dest pêkerd, ANFyî rê erjnayîşî kerdî. Beşê diyînî yê roportajê Cemil Bayikî ra qismêk wina yo:

''Rojhelatê Mîyanênî semedê sîstemê modernîteya kapîtalîstî bingeyo esas o. Nê semedî ra seba ke Rayber Apo tesîrê şarê Rojhelatê Mîyanênî mekero, waşt verê ci bigîrê. Çunke sîstemê modernîteya kapîtalîste wazena heme dinya de hegemonyaya xo pê bîyaro. Rayîrê nê zî Rojhelatê Mîyanênî ra ravîyereno. Coka înan waşt çîyo ke semedê înan tehluke yo werte ra wedarê. Rayber Apo semedê înan tehluke bi û bi komployî waşt verê ci bigîrê.

Înan Komployê Mîyanneteweyîyî kerd ke Rojhelatê Mîyanênî de rehet têbigêrê. Dewleta tirke waşt nê ra feyde bikero, waşt PKKyî tesfîye bikero û kurdan qir bikero. La ne sîstemê modernîteya kapîtalîste ne zî Tirkîya netîce ke waşt girewt. Înan waşt semedê netîcegirewtişî îtîfaqanê bînan ronê. Tîya de Barzanîyî û Iraqî reyde tay îtîfaqî kerdî. Dewleta tirke zanayê ke eke îşxalkeran û îqtîdaran Rojhelatê Mîyanênî de mîyaro têhet, nê hêzan û hêzanê kapîtalîstan meresno pê nêeşkena PKKyî tesfîye bikero û kurdan qir bikero. Dewleta tirke nika na çarçewa de xebatan rarya bena. Xebatanê zaf tehlukeyinan kena. Ganî şarê ma û dostê ma na raştîye hol fam bikerê. Eke ma na rewşe hol fam mekerê, ma nêeşkenê têkoşînê raştî rayra berê û biresê hedefê xo.

Her kesî vatêne qey Rayber Apo, PKK û kurdê azadî hinî çîn benê. La Rayber Apoyî komplokarî û hemkarê înan analîz kerdî, waştişê înan fam kerdî. Rayber Apoyî cewabo xurt da komployî, xo kerd hêzê çareserî û waştişê înan betal kerdî. Rayber Apoyî paradîgmaya newî aver berde û semedê cinîyan, ciwanan, kesanê ke semedê  sosyalîzm, azadîye û demokrasîyî têkoşîn kenê, hêvî xurtêr kerd. Komployê Mîyanneteweyîyî şexsê xo de betal kerd. Na paradîgma çend şino dinya ra vila bena.

Merkezê şerî Rojhelato Mîyanên o û Rojhelato Mîyanên zî Kurdîstan o. Êyê ke serkêşîya sîstemê modernîteya kapîtalîste kenê seba ke sîstemî kaos û krîzan ra vejê Rojhelatê Mîyanênî esas girewto. Sîstem Îsraîlî erzeno vernî, wazeno hêzdar bikero. Wazenê Rojhelatê Mîyanênî newera dîzayn bikerî. Sey şerê mabênê Îran û Îsraîlî ramojnenê la eslê xo de no şer mabênê modernîteya demokratîke û modernîteya kapîtalîste de yeno kerdene. Dewleta tirke xo sey vera Îsraîlî mojnena ra la eslê xo de vera ci nîya. Dewleta tirke vana 'ez endama NATOyî ya, xora şima mi ard îqtîdar ke ez qirkerdişê vera kurdan temam bikerî, PKKyî tesfîye bikerî  û Rojhelatê Mîyanênî de sîstemê zixmî ronê. Ma  nê semedî ra DAÎŞ afirna la şima ewro Îsraîl û tay welatanê ereban erzenê vernî, no goreyê menfeatê mi nîyo.' Îran zî nê goreyê menfeatê xo nêvîneno. Sîstem keno ke bi destê Îsraîl û tay welatanê ereban dewleta tirke û Îranî zehîf bikero. Coka Îran û dewleta tirke vera Îsraîlî vejîyenê.

Ewro vera kurdan, şarê Fîlîstînî û Rojhelatê Mîyanênî qirkerdişî yenê kerdene la çew vengê xo nêvejeno.  Ma vera şer û qirkerdişan ê. Vera nê ma têkoşînê azadîye û demokrasîyî rayra benê. Ma do têkoşînê xo dahîna xurt bidomnê. 

Hêzê serdeştî çareserîya demokratîke nêwazenê. Rayber Apo wazeno PKK û Rojhaletê Mîyanênî nê şerê leyminî ra vejo û semedê şaran pelo newe abikero. Wazeno ke wa Rojhelato Mîyanên de azadîye, demokrasî û edalet bîyaro caardene. Seba ke verê Rayber Apoyî bigîrê, verê DAÎŞî akerd. Xora paştdayîşo tewr pîl Tirkîya da DAÎŞî û hema zî paştî dana ci. Coka ganî her kes têkoşînê Rayber Apoyî esas bigîro. Çareserî paradîgmaya Rayber Apoyî de ya. Îsraîl- Amerîka û Îran û Tirkîya serkêşîya şerî kenê. La sîstemê modernîteya kapîtalîste verê Îran û Tirkîya zî gena. Coka nê wird dewletî rehat nîyê. Ganî nê pêkewtişan ra şorişê modernîteya dmeokratîkî bêro averberdene. Wezîfeyê her kesî Rojhelatê Mîyanênî de no yo.''