Hemserekê Konseya Rayberdişî ya KCKyî Cemîl Bayikî bi wesîleya serrgêra 44. ya ronayîşê PKKyî ANFyî rê qisey kerd. Beşo çarin ê qiseykerdişê Bayikî bi kilmî wina yo:

''Karakterê Şorişê Rojawanî destpêkî ra nata şerê şarî yo şorişgêr bi, xoverdayîşê vera DAÎŞî de zî û Kobanê de zî no şer ame kerdene. La dima heyf ke Efrîn, Serêkanîyê û Girê Sipî de şarî şer YPGyî rê verda û nê cayî ameyî îşxalkerdene. Bêguman şarê Rojawanî bedelê pîlî dayî, şehîdî dayî. La ganî waranê şorişê şarî de şerê şarî yo şorişgêr bêro kerdene. 

Ma pê bawer ê ke şar û şerwanê Rojawanî tecrubeyanê şerê 10 serrî rê dersanê girîngan gênê. Dewleta tirke Rojawan de bi taybetî hêrişê keyeyanê welatperweran kena û bi nê hawayî verê şerê şarî yê şorişgêrî gêna. Eke dewleta tirke reyna hêriş bikera şero topyekûn do bêro rojdem û no şer heta îşxalkerî do bêrê vetene do dewam bikero. 

PDK vera hêrişanê îşxalî hetê dewleta tirke de ca gêno, hêrişan meşrû keno, PKKyî sey dişmenî mojneno. Çew vano qey dewleta tirke soz dayo ci ke çîyêk bida ey. AKP-MHP pê dişmenîya xo ya vera kurdan şinasîyeno. Îtîfaqê înan de xêr çin o. Pêro dinya nê îqtîdarî sey dîktatorîye vînena la têna PDK tira vano 'demokratîk.' Goreyê PDKyî dewleta tirke, Erdogan û Bahçelî têna dişmenê PKKyî yê, dişmenê kurdan nîyê. Merdimê tewr cahîlî zî zanenê ke Bahçelî dişmenê kurdan o. 

PDK warê mîyanneteweyî de zî hem PKKyî hem zî şorişgêranê Rojawanî reş keno. Pêro xîretê PDKyî dişmenkerdişê PKKyî ser ê. PDK wazeno PKKyî pê destê dewleta tirke tasfîye bikero û pêro kurdan ser o bibo hêzo hegemon. La nêzaneno ke dewleta tirke qetî destûr nêdana ney. Ma vatênê qey meseleyê ma yê bi PDKyî qedîyayî. La dima ke PKK bi hêzêr û pîlêr PDKyî polîtîkayê xo vurnayî û bi dişmenê PKKyî. Eke PDK waştişê 'hêzê hegemonîkî' ra fek vera bido nêkeweno nê halî. Eke kurdî bibê yew û bihêzêr no do fayde bido PDKyî zî. 

Têkoşîno ke PKK rayberîya ci keno ho dekeweno serra 44. Şarê kurdî nê 44 serran de wayîrê ê hêzî bi ke her hêrişî bişikno û xo ver bido. Rayber Apoyî bi desan reyî îmkan da ke dewleta tirke meseleya kurdan çareser bikera la înan nêkerd. Înkar û polîtîkaya qirkerdişê vera kurdan têna Vakur de nê pêro parçeyanê Kurdîstanî de estê. PKK do naye ra pey zî semedo ke kurdan qirkerdişî ra bixelisno û azad bikero rayberîya nê têkoşînî bikero.

Dewleta tirke semedo ke qetî polîtîkaya qirkerdişê kurdan ra fek vera nêda Planê Çokdayîşî vist dewre. 2015 ra nata pêro hêrişê vera kurdan nê esasî ser o yenê kerdene. La AKP-MHPyî rixmê pêro îmkananê xo zî yew netîce nêgirewte. Rayberîya PKKyî de zere û teber de her warî de têkoşînêk ame kerdene. Coka AKP-MHP ewro xeylêk krîzan de têrî yo. Rijîyayîşê nê îqtîdarî rojdem de yo. Xora eke paştdayîşê hêzanê teberî ra nêbîyêne rew ra do birijîyayêne. 

No îqtîdar pê weçînayîşî nê do pê têkoşînî şoro. Hêzanê teberî ra nêbo halê îqtîdarî nêmendo ke payan ser de vindero. Eke hêzê demokrasî bi qerardarî ser de vinderê îqtîdar hewteyêk nêeşkeno vindero. Coka hêzê demokrasî eşkenê têgêrayîşê şorişî bidê destpêkerdene. Çunke hînî bingeyê ci zî paştî nêdano nê îqtîdarî. Beno ke hêzê înan ê çekdarî estê. La eke şar şêro serê înan îqtîdar hînî do biremo. Hêzê ke verê demokratîkbîyayîşê Rojhelatê Mîyanênî gênê îqtîdarê AKP-MHPyî û dewleta tirke yê. Kurdan pê Hemleya 'Wextê Azadîye' cara îqtîdar ard verê rijîyayîşî. Yewîya têkoşînî Kurdîstan de eşkena bêra bihêzkerdene. Hêzê sîyasî yê Kurdîstanî eke her beşê komelî bi rêxistin bikerê û tewrê têkoşînî bikerê îqtîdarê AKP-MHPyî binî ra rijîyeno.

6 serran ra nata gerîlayî vera Planê Çokdayîşî têkoşîn kenê, rayberîya nê têkoşînî kenê. La ganî no şer têna milê gerîlayan de nêbo.Eke vera ekonomîya îqtîdarî hêrişî bêrê kerdene îqtîdar do daymîş nêno. Yanî wa her kes na şerî de mesuldarîya xo bivîno û goreyê mesuldarîya xo têbigêro. Têkoşînê vera ajankerdişî, madeyanê kundoxî û fuhuşî zî ganî sey têkoşînê vera îqtîdarî bêro dîyene.

Nê dewrî de cinîyan îqtîdar kerd qels û rolêko pîl ard ca. Cinîyî rixmê teda û tepiştişan xo ver danê. No zî cesaret dano hêzanê demokrasî. Karkerî zî têkoşîn kenê la ganî têkoşînê xo bihêzêr bikerê. Bawermendî bi taybetî misilmanî vînenê ke AKP dînî rê îxanet keno. Wa bawermendî pê nê îqtîdarî bawer mekerê. 

Dewleta tirke tim pê polîtîkaya şerê taybetî têgêraye. La Rayber Apoyî na raştîya dewlete hol deşîfre kerde. Pê têkoşînê PKKyî dinya zî kurdan zî no şerê taybet nêzdî ra şinasna. Dewleta tirke verî semedo ke qirkerdişê kurdan mîyan bikero dinya xapînayêne. Têkoşînê ma Darbeya 12ê Êlule de na raştîya dewlete teşhîr kerde. Hemleya 1984î ra dima dewlete dest eşt metodanê hîna gemarinan, dewî vêşnayî kerdî veng, kurdî kerdî koçber û 17 hezar faîlî meçhul kerdî.

Dewleta tirke armanc kerdêne ke pê Komployê Mîyanneteweyî Rayberîye û PKK tasfîye bikera û nê metodanê şerê taybetî bidê vîrakerdene. La xoverdayîş, paradîgma û tewirê Îmraliyî yê Rayber Apoyî destûr nêda ney. Pêro dinya dî ke dewleta tirke nêwazena pê rayîranê demokratîkan meseleya kurdan çareser bikera. Pê têkoşînê ma yê 44 serrî rîyo raştikên ê dewleta tirke ame dîyene û têkoşînê kurdan zî hîna hol ame famkerdene. Paradîgmaya ekolojîke, demokratîke û azadîgîra cinîyan, Konfederalîzmê Demokratîkî û sosyalîzmê demokratîkî eşkera kerd ke têgêrayîşê ma têgêrayîşêko senîn o. Pê pratîkê Rojawanî zî dinya, hêzê demokratîkî, şarî dormeyê kurdan de ameyî pêser û wayîrê têkoşînê kurdan vejîyayî. Bi nê hawayî dewleta tirke hîna zêde teşhîr bîye.

Polîtîkayê reşkerdişê PKKyî yê NATO, dewleta tirke û mutefîqanê înan ameyî şiknayene. Propagandaya reşe ya hêzanê sey PDKyî ra nêbo sempatîya vera PKKyî do bizêdîya. Her çî ra verî tecrîd ame şiknayene. Ney zî kerd ke têgêrayîşê azadîye bibo wayîrê îmkananê pîlan. Hînî eşkera bîyo ke polîtîkaya dewleta tirke qirkerdişê kurdan o. 

Semedo ke Ewropa û Amerîka PKK girewt lîsteya terorî dewleta tirke eşkan şarî rê teda û zulm bikera. Nika têkoşînê 'PKK lîste ra bêro vetene' yeno kerdene. Nika ra nê esasî ser o tay dewletan de têkilîye ronîyena. Bi nê hawayî têkoşînê azadîye yê kurdan hetê dewletan ra zî şinasîyeno. No zî do derbêka pîle bido polîtîkayanê qirkeran ê dewleta tirke. Çunke qet yew dewleta demokratîke nêwazena biba hemkara polîtîkayanê qirkeran a dewleta tirke.''