Hemserekê Konseya Rayberdişî ya KCKyî Cemîl Bayikî bi wesîleya serrgêra 44. ya ronayîşê PKKyî ANFyî rê qisey kerd. Beşo hirêyîn ê qiseykerdişê Bayikî bi kilmî wina yo:

 Koma Apogîran destpêkî ra nata tim pratîkê reel sosyalîstî ra girewt. Kongreya 4. ya PKKyî serra 1990î de sosyalîzmê reelî ser o rexneyî estbîyî. La bi vateyê 'sosyalîzmî de israr merdimîye de israr o' ma xîret kerd ke hetê kêmî yê sosyalîzmî xurtêr bikerê. Rayber Apoyî Kongreya 5. de vurîyayîşê PKKyî ercna. Rayber Apoyî dî ke eke vurîyayîş nêro kerdene PKK zî do sey partîyanê bînan ê sosyalîstan çin bibo. Bira vurîyayîşî Kongreya 5. de bîye gamêka girînge.

Rayber Apoyî fam kerd ke vera komployê muxtemelî de PKK do a paradîgmaya xo nêeşkayêne ser bikewo coka xo newe bikero. La semedo ke tay kadroyan no vurîyayîş fam nêkerd û  semedo ke mîyanê partîye de hetê tasfîye estbi no vurîyayîş kewt erey. Komployê Mîyanneteweyî ra dima Rayber Apoyî no vurîyayîş hînî elzem dî. Ey Îmrali de vera sîstemê kapîtalîzmî na paradîgma o çax aver berde. Na paradîgma ra nêbîyêne têkoşînê PKKyî do qels bibîyêne.

Xêrê kesayetê şorişgêra û taybetmendîyanê şorişê Kurdîstanî ra paradîgmaya Rayber Apoyî hende dinya ra vila bîye û veng vet. Kurdîstan amebi kerdene 4 parçeyî. Coka têkoşînê azadîya Kurdîstanî têkoşînêko herêmî û mîyanneteweyî yo. Coka têna pê têgêrayîşêkê 'neteweyî' Kurdîstan nêameyêne azadkerdene. Nê esasî ser o Rayber Apoyî paradîgmaya komelê ekolojîkî, azadîya cinîyan û komelê demokratîkî vete werte. Bi nê hawayî zî raştîya konfederalîzmê demokratîke ameye destvistene. Na xete verî Kurdîstan û Rojhelatê Mîyanênî de ameye pratîzekerdene.

Ewro partîya tewt bitesîre ya kurdan PKK, rayberîya tewr bitesîre zî Rayber Apo yo. Şarê kurdî cara hol zaneno ke kam wayîrê kurdan û Kurdîstanî vejîyeno. Stratejîyê demokratîzekerdişê Kurdîstanî û azadkerdişê Kurdîstanî yew ê. PKKyî qetî Kurdîstanî ra fek vera nêda. PKK pê polîtîka û çalakîyanê xo vera ê kesanê ke kurdan û Kurdîstanî war verdenê gêno. PKK her ca de kurd û Kurdîstanî paweno. PKKyî Şingal, Kerkûk, Kobanê, Hewlêr de şer kerd, şehîdî dayî. PKKyî pêro dinya û Rojhelatê Mîyanênî de nameyê kurdan da eşnawitene. Hêrişê vera raştîya PKKyî yeno manaya hemkarîya bi dişmenî. Kesê ke vanê 'PKKyî Kurdîstan û kurdan ra fek vera dayo' MÎT û dewleta tirke ra paştî gênê. 

 Rayber Apoyî bi serran firsen da AKP ke wa meseleya kurdan çareser bikero. La AKPyî tim xîret kerd ke kurdan û partîye bixapîno. Rixmê nêzdîbîyayîşê Rayber Apoyî zî înan weçînayîşê 12ê hezîrana 2011î ra dima xîret kerd ke gerîlayan pûç bikerê la ney de ser nêkewtî. Têgêrayîşî vera ney şerê şarî yo şorişgêr dabi destpêkerdene. Dima înan reyna verê xo da Îmraliyî. La înan prosesê çareserîye qedîna û 2014 de zî paştî daye DAÎŞî. Hetê bînî ra zî 'Planê Çokdayîşî' amade kerd.

Rayber Apoyî seba ke verê şerî bigêroo 28ê sibata 2015î de Mutabaqatê Dolmabahçe pêşkêş kerd la Erdogan na çareserîye zî red kerde.Dima  tecrîdo giran ê Îmraliyî da destpêkerdene. Hêrişanê DAÎŞî û hêrişanê dewlete ra dima şarî xoverdayîşê xoîdarekerdişî da destpêkerdene. Şarê kurdî rayberîya Çîyager, Axîn û Zeryanan de xeta xoverdayîşî berde astêka berzêre. Eke ewro Herêmanê Pawitişî yê Medya de xoverdayîşo winasên yeno kerdene no xêrê çêranê xoverdayîşê xoîdarekerdişî ra yo. Nika pêro kurdî pê xoverdayîşê Herêmanê Pawitişî yê Medya sereberz ê.

Îqtîdarê faşîstî yê AKP-MHPyî û dewlete vatêne qey înan sibate de Garê de ser bikewê, şorê weçînayîş ser bikewê û hînî îdareyê xo yê faşîstî mende bikerê. La xoverdayîşê gerîlayan ê Garê hesabê AKP-MHPyî pûç kerdî. Coka înan seba ke qesasê ney bigêrê 23ê nîsane de vera Zap, Metîna û Avaşînî yê Herêmanê Pawitişî yê Medya hêrişê îşxalî dayî destpêkerdene. Înan vatêne qey 15 rojan de nê cayan îşxal bikerê la bîyo 7 mengî hert roje derban wenê. Dima ke bin kewtî dişmenî dest eşt çeka kîmyewîye. Artêşa tirka ke wina yena mojnayene ke Lîbya, Azerbaycan ra heta Armenîstanî nêna vindarnayene Herêmanê Pawitişî yê Medya de ameye vindarnayene û netîceyê ney ê girîngî yê sîyasî estê. Nê xoverdayîşê gerîlayan moralêko pîl da kurdan û şaranê bînan ê Tirkîya, şarê Rojawanî kerd xurtêr. No xoverdayîş têkoşînê azadîye ra bi nefes. 

Avaşîn, Zap û Metîna de gerîlayan pê fedayîtîya 14ê Temmuze xo ver da, xeta Zîlane de xo ver da. Nê gerîlayanê ciwanan seke govende girewtêne no xoverdayîş pê coşî ard ca û pê nê tewirê xo ters vist zerrîya dişmenî. Nê gerîlayan û şehîdanê ma xeta îdeolojîya Rayberîye reyna îsbat kerde. Naye ra pey zî şarê ma û ciwanê ma embazî, welatperwerî, xet, perwerîya nê embazan xo rê esas û mîsal bigêrê. Hînî nê xoverdayîşî ra kêmîyêr yew xoverdayîş do nêro kerdene. Xora nê embazanê ma yê gerîlayan zanayêne ke ê hê hêzêkê xurtêr danê şarê kurdî, têkoşînê azadîye. Înan bi na mesuldarî serfîrazîye û xoverdayîş vistî destî. Şehîdanê nê xoverdayîşî serfîrazîye viste destî. Naye ra pey wezîfe ho milê xoverdayoxanê bînan, ciwanan, cinîyan ê kurdan û şarî de yo. Ma pê bawer ê ke ê zî do nê ruh û moralî xo ver bidê, faşîzmê AKP-MHPyî birijnê û hesreta şehîdanê nê xoverdayîşî bîyarê ca.''