Hemserekê Konseya Rayberdişî ya KCKyî Cemîl Bayikî bi wesîleya serrgêra 44. ya ronayîşê PKKyî ANFyî rê qisey kerd. Beşo peyên ê qiseykerdişê Bayikî bi kilmî wina yo:

''Amerîka û Ewropa hema paştî danê dewleta tirke la rayrapêroyî tira dûrî vindeno. Sempatîya Hêzanê demokrasîyî û şaran têkoşînê azadîye rê esta.  Coka paştî bidîyo dewleta tirke zî sey verî nêbeno. Sey verî eşkera paştî nêdanê û ge-ge Tirkîya rexne zî kenê. No zî zor dano Tirkîya. Hetê bînî ra hêzê demokrasîyî û şarî paştî danê Têgêrayîşê Azadîye. Coka dewlete ke paştî danê Tirkîya tengayî ancenê. Rojhilatê Mîyanên cayê ronayîşê dengeyanê dinya yo. Coka tewirê dewletan zafêr tesîr keno.  Nê  semedî ra zulmê dewletan nêvînayîşî ra yeno. Kurdî hînî hêzêko pîlî ê Rojhilatê Mîyanên ê.  Coka nê hêzî do mecburê bimanê ke estbîyayîşê kurdan qebul bikerê. Nika paştî bidê qirkeran zî eke têkoşînê ma dewam bikero do tewirê nê hêzan sey verî memano.

Kurdî nika wayîrê îdeolojîya tewr pîle ya dinya yê û Rojhilatê Mîyanênî de serkêşê demokrasîyî yê. Tirkîya, Iraq, Surîye û Îran de serkêş ê. Kurdî do bi cuya xo ya dmeokratîke û azade nê welatan de bibê tesîrê muhîmî. Kurdî do bi zîhnîyetê demokratîkî pîl ser bikewê.  Zînîyetê netewe dewlete  semedê kurdan tehlukeyin û xap o. Rojhilatê Mîyanenî de hinî qet çîyêk sey verî nêbeno. Şaran game eşte dewrê azadîye û demokrasîyî. Rojhilatê Mîyanênî do newe ra bibo cografyaya muhîme ya medenîyetî. Bêşik şarê wayîrê îradeyê demokratîkî do tekîlîya hegemonyaya emparyalîste qebul nêkerê. Şerrê Dinya yê 3. do Rojhilatê Mîyanênî de hema  demêk bêro domnayene. Kurdî do nê şerî de hema bedelan bidê la bi têkoşînî biresê cuya demokratîke û azade.

PKKyî 43 serran de semedê Kurdîstan û Rojhilatê Mîyanênî de averşîyayîşê muhîmî afernayî. Şarê kurdî kerd sey şarêkî ke her ca de semedê azadîya xo têkoşîn keno. Kurd gankêşî ra girewt, kefenê ci dirna. Bêşik sere de dewleta tirke dişmenê kurdan polîtîkaya qirkerdişî canêverda la zîhnîyetê qirkerî ameyî nuqtaya rijnayîşî. Serra 44. de eke ma faşîzmê AKP-MHPyî birijnê têna Kurdîstan ne heme Rojhilatê Mîyanênî de do bedilnayîşî bêrê afernayene. Coka hedefê ma rijnayîşê faşîzmî yo. Xora serra 43. de Garê, Zap, Metîna û Avaşîn de bin kewtî. Reyna kurdan û hêzanê demokrasîyî zor da îqtîdarî. Xora nika faşîzmê AKP-MHPyî her hele tersê rijnayîşî ciwîyeno. Ma wazenê çîyo ke ê tersenê bîyarê înan ser. Her hêriş û îşxalo ke îqtîdar tersî ra keno rijnayîşê ci dahîna keno nêzdî.

Seba ke înan hêrişê Herêmanê Pawitişî yê Medya kerd ê do pîşman bibê. Xora eke PDKyî paştî medayêne, înan cesarat nêkerdêne erdî ra debikewê waranê gerîlayan. Me seba ke heme hêrişan pûç vejê û înan rê bidê vînîkerdene çîyo ke kuweno milê ma, kenê. Eke kurdî û hêzê demokrasîyî têkoşînî pîlêr bikerê do îqtîdar birijîyo. Pîya bi rijnayîşê faşîzmî ma semedê azadîya Rayber Apoyî de hemle danê rayraberdene. Hedefêkê  Hemleya Dem Demê Azadîye ra yew zî şiknayîşê mifteyê Îmraliyî yo. Azadîya fîzîkîye ya Rayber Apoyî hinî ameya rojdemkerdene. Hinî Tirkîya de zî yeno vatene ke ganî berê Îmraliyî bêrê akerdene.

Serkêşîya Rayber Apoyî de pratîkê 43 serran ê PKKyî ramojna ke têkoşînê ci dano qezenckerdene. Serra newîye ya PKKyî de ganî kadroyî xeta Raybarîye û PKKyî de kêmayîyanê xo vînê û têkoşînî pîlêr bikerê.  Ganî qet yew îdarekar û kadro bi xeletîyan meciwîyo. Modernîteya Kapîtalîste nika xo kerdo bari xo mîyanê cuya rêxitine de ca keno. Coka ganî vera naye têkoşîn bêro kerdene. Tewr hole şarê ma zano ke PKK senî yew partî û têgêrayîşo sîyasî yo.  Rayber Apo senî hetê şarî ra yeno heskerdene no zî yeno zayene. Rayber Apoyî bi paradîgmaya xo ya newîye têna şar tewrê çalakîyan nêkerd eynî wextî de komelo rêxistinkerde aferna. Cayo tewr pîl ê têkoşînî warê gerîlayan o. Semedê rijnayîşê faşîzmê AKP-MHPyî tewrbîyayîşê gerîlayan muhîm o.''