Hemserekê Konseya Rayberdişî ya KCKyî Cemîl Bayikî Stêrk TV de beşê diyînî yê roportajê xo de hêrişê dewleta tirke û PDKyî, tewirê Amerîka, Rûsya û Şamî yê vera Rojawanî û krîzo komelkî û sîyasal ê Tirkîya ercnayî.

Qiseykerdişê Bayikî ra tay noqtayê girîngî wina yê:

''Dewleta tirke dişmena kurdan a, pêro polîtîkayê ci nê yê ke Kurdîstan de kurdan çin bikera. Coka hêrişê xozaya Kurdîstanî kena. Dewlete Kurdîstan de awbendan virazena, daristanan vêşnena, dewan rijnena, fuhuş vila kena yanî seba ke cuye kurdan rê zehîr biba her çi kena. Meseleya ekolojî meseleya demokrasî û azadîye ra cîya nîya. Coka wa şarê ma wayîrê xozaya xo vejîyo, meverdo dişmen xozaya Kurdîstanî talan bikero û vera nê sîyasetî têkoşîn bikero. Roşnvîr, sosyalîst û demokratê kurdan zî ganî wayîrê têkoşînê ekolojîkî yê kurdan vejîyê.

Erdogan û dewlete seba ke kurdan qir bikerê pêro îmkanan pêşkêşê şerî kenê. Sebebê krîzê ekonomîkî yê Tirkîya şerê vera kurdan o. Wa şarî bizanê ke meseleya esas a Tirkîya ekonomî nê şer o. Kesê ke vera nê şerî nêvejîyenê çend vera îqtîdarî nêrazîbîyayîşê xo bimojnê zî qet yew mesele safî nêbena. Heta ke şerê vera kurdan nêqedîyo no krîz zî nêqedîyeno. Ganî her kes vera nê şerî têkoşîn bikero. O çax krîz qedîyeno.

Eke ewro îqtîdarê AKP-MHPyî sercêr bîyo sebebê ney têkoşînê têgêrayîşê ma yo. Ma bedelanê giranan danê, dejanê pîlan ancenê la îqtîdar zî ho rijîyeno. Îqtîdar naye ra wazeno PKK û şarê kurdî ra qesasê xo bigêro. Eke no îqtîdar şoro hişmendîya welatî zî vurîyena. Coka sîstemê kapîtalîzmî û sermayedarî nêwazenê îqtîdar şoro. Îtîfaqê Mîletî vera nê îqtîdarî têkoşînêkê xurtî nêkeno, bernameyê ci yo demokratîk çin o.Ganî hêzê sosyalîst û demokratîkî rayîrê 3. yo ke Rayber Apoyî aferna xo rê esas bikerê. Bi nê hawayî eşkenê Tirkîyaya demokratîke awan bikerê.

Dewleta tirke va qet eke a Yûsif Guloyî şehîd bikera şarê Rojawanî terseno la eqsê ci bi. Dewleta tirke pê paştdayîşê Amerîka û Rûsya wina xidarî hêrişê Rojawanî kena. Amerîka û Rûsya seba menfaatanê xo destûr da îşxalê Tirkîya. Ewro îtîfaqê şaranê Rojawanî aver şîyo ke no xêrê sîyasetê Rayberîye ra bîyo. Coka şarê Rojawanî wayîrê Rayberîye vejîyeno.

Eke Sûrîye xo rê modelê Rojawanî esas bigêra eşkena meseleyanê xo çareser bikera. Eke Sûrîye, Amerîka û Rûsya sîyasetê xo yê verênî de israr bikerê krîzê Sûrîye çareser nêbeno. Ma wazenê pêro meseleyî mîyanê yewparetîya Sûrîye de çareser bibê. Ma heta nika bi nê şîarî têgêrayî. Xêrê têkoşînê Rayber Apoyî ra Rojawan de modelêk vejîya werte. Rayber Apoyî bingeyê îtîfaqê şaranê Rojawanî eşt û ey no model seba pêro Rojhelatê Mîyanênî aver berd.

PKK, şerwananê Rojawanî û êzidîyan pîya vera DAÎŞî şer kerd û derbê pîlî dayî piro. Êzidîyan bedelê giranî dayî. Coka dinya ganî waştişê ci yê xoserîye qebul bikera. Êzidîyan seba ke xo îdare bikerê û bipawê têkoşîn kerd, dezgehê xo awan kerdî. PDK û Tirkîya ney nêwazenê. La eke êzidîyî hîna zaf têkoşîn bikerê qetî do xoser bibê. Coka ganî yewî û xoverdayîşê êzidîyan bêrê xurtkerdene. Rayîrê pawitişê êzidîyan Şingalî ra derbaz beno. Êzidîyî wa verî seba xoserîye têkoşîn bikerê. Sey têgêrayîşî wezîfeyê ma yo ke ma paştî bidê êzidîyan. PDK û Tirkîya vera hêrişê Şingalî kenê û wazenê îradeyê êzidîyan bişiknê. La êzidîyî vera ney xo ver danê, wayîrê erj û şehîdanê xo vejîyenê, seba azadîya xo têkoşîn kenê. Ez înan fîraz kena.

Weçînayîşê teşrîna verêne yê Iraq û Başûrî meşrû nîyo çunle se ra 80ê şarî tewrê ci nêbîyo. Başûr de PDK propaganda keno û vano ê ser kewtî. La têna se ra 12ê merdiman raye daya înan. No serkewtiş nîyo. Şarê Başûrî hînî vurîyayîşî wazeno, nê îqtîdarî qebul nêkeno. Paradîgmaya Rayberîye do Iraq û Başûrî rê zî biba çareserîye. Îran de (Rojhelatê Kurdîstanî) de zî ma wazenê meseleyî pê dîyalogan çareser bibê. Kurdê Rojhelatê Kurdîstanî zî ney wazenê. Ganî Îran vera kurdan şer mekero. Kurdî nêwazenê Îran parçe bikerê, têna heqanê xo yê meşrûyan wazenê. Coka Îran ganî waştişanê kurdan qebul bikero.

Eke ciwanê kurdî vera sîstemê kapîtalîzmî têkoşîn bikerê o çax eşkenê komelî bipawê. Sîstemo kapîtalîst pê şerê taybetî Kurdîstan de fuhuş, madeyanê kundoxî û ajanîye vila keno. Ciwanî ganî vera ney têkoşîn bikerê. Seke Rayber Apoyî vatbi ma têgêrayîşê ciwanan ê. Seba ke ciwanî rayberê têgêrayîşê ma yê dewleta tirke hêrişê înan kena. Ciwanî zaf waran de têkoşîn kenê ke gerîlatîye zî nînan ra yew o. Ganî ciwanî zêdêr tewrê gerîlayan bibê û vera şerê psîkolojîkî xo ver bidê.

Serra 2021î de têkoşînêko pîl ame kerdene. No zî mojneno ke 2022 de têkoşînêko senîn do bêro kerdene. AKP-MHP ame verê rijîyayîşî ganî ma 2022 de nê rijîyayîşî temam bikerê. Armancê ma binvistişê nê îqtîdarî yo. Ez pê bawer a ke 2022 de kampanyayê seba azadîya Rayberîye bi aktîf, tesîr û zêde bêrê kerdene. Ewro pêro dinya Rayber Apoyî, PKKyî, têkoşînê cinîyan ê kurdan xo rê esas gêna. 2022 de ma nê esasî ser o do têkoşîn bikerê. Ma têgêrayîşêkê Kurdîstanî û Rojhelatê Mîyanênî yê. Coka ma 2022 de zî do seba Rojhelatê Mîyanênî têkoşîn bikerê. Ma do vera şero ke AKP-MHPyî dayo destpêkerdene 2022 de xoverdayîşêkê pîlêrî bikerê. Ma do wina bikewê 2022. Ma do 2022 de hemleyanê xo ra netîce bigêrê.

Nê esasî ser o ez serra newîye ya her kesî fîraz kena û her kesî rê serkewtiş wazena.''