Hemserekê DBPyî Bayindirî ard ziwan ke ê wextêkê stratejîkî de yê, ganî karî goreyê ney bêrê kerdene. Bayindirî bale ante girîngîya asfernayîşê atmosferêkê komelkî û sîyasî ser ke tede Abdullah Ocalan rolê xo do bîyaro ca.
Hemserekê Partîya Herêmanê Demokratîkan (DBP) Keskîn Bayindirî ANFyî rê qisey kerd û îfade kerd ke ê wextêkê stratejîkî de yê.
Keskîn Bayindirî dîyar kerd ke Rayberê Şarê Kurdî Abdullah Ocalan çar parçeyanê Kurdîstanî de lîderê têkoşînê demokratîkî yê bi mîlyonan kesan o û vat: ''Bi têkoşînê azadîye serkêşîya Ocalanî de komplo ame pûçkerdene. Komployo diyîn zî 1999 ra nata şexsê Ocaalnî de vera têkoşînê azadîye asta mîyanneteweyîye de yeno kerdene. Îqtîdarê AKP-MHPyî bi destekê hêzanê mîyanneteweyîyan wazeno sîstemê tecrîdî yê Îmraliyî tim bîyaro ca, qirkerdişê kurdan temam bikero. Têkoşînê azadîye yê kurdan vera ney apey gamêke zî nêeşte. Komelî qetî perwerîya bi Ocalanî ra fek vera nêdaye.
Ganî ma vera polîtîkaya tecrîdî têkoşînê xo rê dewam bikerê. Seba tasfîyekerdişê sîstemê tecrîdî yê Îmraliyî emser her serre ra girîngêr a. Ma kewenê wextêkê winasênî ke dewleta tirke kena ke seserra xo ya diyîne de xo newe ra restore bikera. Dewleta tirke pê mezgê înkar û qirkerdişêi têgêrena, wazena reyna kurdan qir bikera. Ma zanenê ke dewleta tirke pêro îmkan û dînamîkanê xo seba ney têgêrena.''
Bayindirî da zanayene ke ê wextêkê stratejîkî de yê û vat: ''Seba ameyoxê hêzanê şorişgêran ê Tirkîya û têkoşînê azadîye yê kurdan na serrêka stratejîk û dîyarker a. Seba ke Abdullah Ocalan bikewo dewre, seba ke tecrîd bêro wedaritene û o bieşko rolê xo yê serkêşîye bîyaro ca têkoşînê ma zaf stratejîk o. Seba ameyoxê şaran ma astêka stratejîke de yê. Ganî ma atmosferêkê komelkî sîyasî yê winasênî biafernê ke tede Ocalan seba çareserîya meseleya kurdan rolê xo yê tarîxî do bîyaro ca. Ma eşkenê sey têgêrayîşê kurdan, têgêrayîşê demokrasî û şorişgêran seba nê armancî bibê yew.''
