Endama Koordînasyonê KJKyî Besê Erzîncan bi mesajêkî venga pêro cinîyan û kesan da ke weçînayîşanê 14ê gulane de raya xo bidê Partîya Çep a Keske. 

Besê Erzîncan mesajê xo de hêverî şehîdê menga gulane yad kerde û xoverdayîşê cinîyanê Rojhelatê Kurdîstanî selam kerd. Mesajê Besê Erzîncan bi kilmî wina yo:

''Rayberê ma 25 serrî yo tecrîdkerde yo. Rayber Apoyî tim seba haştî û azadîya şaranê xîret kerd û seba ney çi rol kewto milê ci ardo ca. Nê prosesê weçînayîşî de Rayberîye ser o xeylêk nîqaşî yenê kerdene. Ma vînenê ke îqtîdarî reyde tay hêzê ke xo demokratîk û azadîgîr pênase kenê, nê prosesî de peyê rantêkê cîdîyî de yê. Yanî serê Rayberê ma yê tecrîdkerdeyî gêrenê rantî. Eke ê hêzê demokratîk ê ganî tecrîdî wedarnê û rexne bikerê. Ez venga pêro hêzanê demokratîkan û azadîgîran dana ke tewirê xo yê serê Rayberîye çiman ra derbaz bikerê, sereraşt bikerê. Êyê ke tecrîd de israr kenê ez înan bi xurtî şermezar kena.

Ma prosesê weçînayîşan ê cidîyî de yê. Wextê îqtîdarê AKP-MHPyî de Tirkîya raşta felaket û krîzanê pîlan ameya. Nika nê prosesê weçînayîşan de firsendê vurnayîşî kewt destî. Weçînayîşanê serekkomarîye ser o Partîya Çep a Keske tay eşkerayîye dayî. La weçînayîşanê wekîlîye de ganî rayî bêrê dayene Partîya Çep a Keske. Partîya Çep a Keske do bi paradîgma, fikr, bernameyê xo eşkena Tirkîya demokratîk bikera. Mîsal Partîya Çep a Keske bi polîtîkayanê xo raştîya cinîyan eşkera kena. Partîya Çep a Keske xeylêk cayan de buroyê cinîyan akerdî, mîtîngê cinîyan kerdî û temsîlîya cinîyan a têdûşte de israr kena. Reyna nêzdîbîyayîşê Partîya Çep a Keske bi elewîyan û beşanê komelî yê bînan zî têdûştî û azadîye ser ê. 

Eke Partîya Çep a Keske nê weçînayîşanê wekîlîye de hûmarêka cidîye bivisna destî do bieşka rolêkê cidîyî bîyara ca. Averşîyayîş, vurnayîş, demokratîkkerdişê Tirkîya de, çareserkerdişê xeylêk krîzanê Tirkîya de, çareserkerdişê meseleya demokrasî, azadîye, meseleya kurdan û meseleya ekonomî de Partîya Çep a Keske do karêkê girîngî bikera. Coka ez venga şarê ma, cinîyan, hêzanê demokratîk û azadîgîran dana ke wa qetî raya xo bidê Partîya Çep a Keske.

Nê weçînayîşan de tewirê elewîyan, cinî û ciwanan zaf girîng ê. Partîya Çep a Keske bi kadroyanê xo elewîyan bi xurtî temsîl kena. Waştişê elewîyan bernameyê Partîya Çep a Keske de est ê. Seba ke Partîya Çep a Keske rayîrê hîrêyînî temsîl kena ganî qetî şarê ma paştî bido ci. Ganî rayî bêrê dayene Partîya Çep a Keske-Îtîfaqê Kede û Azadîye.

Ez venga şarê ma yê Ewropa zî dana ke seba demokratîkbîyayîşê welatî wa raya xo bidê Partîya Çep a Keske. Partîya Çep a Keske reyde Tirkîya do bikewa rojanê rindan û roşnîyan.''