Hemsereka Konseya Rayberdişî ya KCKyî Besê Xozat tewra bernameyê taybetî yê Medya Haber TVyî bîye û rojdem ercna.

Besê Xozat pê yadkerdişê şehîdan dest pê qiseykerdişî kerd. Qiseykerdişê Besê Xozat ra tay noqtayê girîngî wina yê:

''Seke zanîyeno Mehkemeya Qanûnê Bingeyî (AYM) Wezîrîya Edaletî û Buroyê Huqûqî yê Asrinî ra derheqê tecrîdê Îmraliyî de agahîye waşta. Yanî qaşo nê dezgehî demokratîk ê. Tirkîya de kayê muhakemekerdişî yenê kaykerdene. Tirkîya de huqûq çin o. Nê dezgehî pêro destê sîyasetî de yê. Wezîrîya Edaletî zî vano ke Îmrali de tecrîd çin o. Îmrali de tecrîd û îşkence est ê.Bi serran o Rayber Apoyî keye û avûkatê xo nêdîyê. CPT şino Îmrali la derheqê zîyaretanê xo de yew eşkerayîye nêdano. CPT zî bi nê hawayî sîstemê tecrîd û îşkenceyî yê Îmraliyî keno meşrû. Îmrali de îmhayêka fîzîkîye dewre de ya. Pê tecrîdî şarê kurdî rê qirkerdiş yeno ferzkerdene. Şarê kurdî pabeyê ci yo ke CPT, Konseya Ewropa derheqê Îmraliyî de eşkerayîyêke bikerê. CPTyî qaşo adare de eşkerayîyêke bidayêne. Wa CPT hînî qisey bikero. Pê tecrîdî zemînê şerê zereyî yeno awankerdene. Faşîzmê AKP-MHPyî seba ney xîret keno. 

Ma Konferansê Hamburgî de zî dî ke fikr û paradîgmayê Rayber Apoyî hînî pêro dinya ra vila benê û dewleta tirke nêeşkena verê ney bigêrê. Aseno ke pêro dinya wayîra nê fikr û paradîgma vejîyena û azadîya Rayber Apoyî wazena. Reyna asta beşdarîya bi rayraşîyayîşê Dusseldorfî zî girîngîya Rayberîye îsbat kerde. Ganî ma xebatanê winayênan rê dewam bikerê û her ca de bi xurtî azadîya Rayberîye biwazê. 

Dewleta tirke welatanê ereban de dişmenîya vera kurdan ser o hemkarîye nana ro. Nika Yewîya Ereban û Sûrîye newe ra nêzdîyê yewbînan benê. No girîng o. Sûrîye çend demokratîk biba, Îdareyo Xoser hende beno meşrû. Coka ma xîretanê winayênan rê paştî danê. Dewleta tirke kena ke Iraqî bikera dişmenê kurdan. Seba ney zî awa Firatî sey hacetê şantajî şuxilnena. Ma hêvî kenê ke Iraq waştişê Tirkîya ser o do nêgêreno. Çunke dişmenîya vera kurdan zerarî ra ber do çîyêk nêdêra Iraqî.

Dewleta tirke nika Başûrê Kurdîstanî de seba ke îşxalê xo hîra bikera kena ke YNKyî zî sey PDKyî bianca xeta bêbextîye û xayînîye. Dewleta tirke seba ke Silêmanî yanî YNKyî rê hukm bikera DAÎŞî xo rê kena bahane. La YNKyî vera na xeta xayînîye tewirêko raşt mojna û pê nê kayan nêxapîya. PDK şarê kurdî rê ajanîye û xayînîye keno ferz. Kam ke no qebul nêkerd de qetil keno. Tewr peyên Dihok de welatperwer Huseyîn Turelî wina ame qetilkerdene. PDK wijdanê kurdan de sey sûcdarî ameyo muhakemekerdene. 

Nê weçînayîşî zaf girîng ê. Eke AKP-MHP nê weçînayîşan de ser bikewo faşîzm do bibo mende. Îqtîdarê AKP-MHPyî pêro polîtîkayê xo dişmenîya kurdan ser o nayê ro. No îqtîdar vera têgêrayîşê azadîye, şarê kurdî û şaranê azadîgîran şerê topyekûnî keno. Îqtîdarê AKP-MHPyî vera HDPyî dewaya qefilnayîşî akerdo û vano ke têkilîya HDPyî ya bi ma est a. Reyna Selahattîn Demîrtaş seba ke ameyo Qendîl îqtîdar ey pê endamîya rêxistine sûcdar keno. La ê prosesê çareserîye de îqtîdarê AKP-MHPyî asayîşê rayîrî yê heyetê HDPyî ardbi ca. O çax ma Rayberîye rê zaf mektubî şawitêne. Hêverî Erdogan û Hakan Fîdanî nê mektubî wendêne. Embaz Abbasî (Murat Karayilanî) zî vatbi; heta nika tewr zaf AKP-MHPyî ma de têkilîye viraşte. Seke Rayber Apoyî vat o çax AKP-MHPyî waşt ke kurdî ci rê bibê hacet. Seba ke wina nêbo îqtîdarî dişmendîya vera kurdan arde na aste.

Îqtîdarê AKP-MHPyî şaranê Tirkîya rê  merg, tarîtîye û şerî ra ber çîyêk wead nêkeno. Coka ganî hînî no rejîmo faşîst bêro rijnayene.

Îtîfaqê Miletî zî şarî rê yew çareserîye pêşkêş nêkeno. Nê weçînayîşan de ganî Partîya Çep a Keske bi xurtî ser bikewa. No seba demokrasî, çareserîya meseleya kurdan û haştîye girîng o. Seba ke dîktatorîya Erdoganî bêra rijnayene ganî her kes raya xo bido Partîya Çep a Keske. Lîsteyê Partîya Çep a Keske hetê temsîlîya cinîyan û bindestan ra zaf xurt a. Ganî her kes 14ê gulane de şoro sindoqan ser, wayîrê raya xo vejîyo. Ganî her kes seba demokrasî seferber bibo. Tay kesî nîqaşê boykotî kenê. Boykot do teyna dîktatorîye rê fayde bikero. 

Partîya Çep a Keske eşkena verê talanê serê Kurdîstanî bigêra. Nê îqtîdarê faşîsî cinîyan rê her xirabîye kerde. Wextê nê îqtîdarî de qirkerdiş û şîdetê vera cinî û domanan zaf zêdîyayî. Cinîyî seba ke nê îqtîdarî ra bixelisê ganî raya xo bidê Partîya Çep a Keske. Çunke Partîya Çep a Keske têkoşînê azadîya cinîyan kena. Partîya Çep a Keske partîya cinîyan a.  Bi heman hawayî Partîya Çep a Keske partîya ciwanan a. Ganî pêro ciwanî seba serkewtişê partîya xo seferber bibê, şorê sindoqan ser û raya xo bidê.

AKP-MHP elewîyan rê zaf zulm keno, înan asîmîle keno. Tewr peyênî îqtîdarî binê sîwana Wezîrîya Kulturî zî seba elewîyan 'kursî' naye ro. Ê armanc kenê ke tîya de zî elewîyan qir bikerê. Erdlerz de dewlete û îqtîdar nêşîyî herêma elewîyan. Elewîyî qirkerdişî rê teriknayî. Elewîyî ganî nê weçînayîşan de raya xo bidê Partîya Çep a Keske û bi nê hawayî îqtîdarî ra hesabê nê kerdişan bipersê. Ez venga pêro elewîyan dana ke dormeyê Partîya Çep a Keske de bêrê pêser û qetî şorê sindoqan ser.

Şarê Dêrsimî rê vengdayîş

Terteleyê Dêrsimî hema zî dewam keno. Wextê nê îqtîdarî de zî Dêrsim de polîtîkayê înkar û asîmîlasyonî resayî asta tewr berze. Dêrsim de hem qirkerdişo kulturel hem zî qirkerdişê bawerî est ê. Reyna vera cografyaya Dêrsimî hêriş yeno kerdene. Dêrsim merkezê elewîyanê kurdan o. La nika her cayê Dêrsimî de talan est o; ocaxê madenî, HESî û awbendî est ê. Nê kerdişî vera fîrazîya Dêrsimî hêriş ê. 

Ez venga pêro dêrsimijan dana ke wa wayîrê erd, xoza, bawerî, kultur, nasname û tarîxê Dêrsimî vejîyê. Rayîrê ney zî îqtîdarê AKP-MHPyî ra xelisîyayîş o. Coka ez venga pêro şarê Dêrsimî dana ke weçînayîşan de raya xo bido Partîya Çep a Keske. No îqtîdaro ke dişmenê Dêrsimî, elewîyan û kurdan o wa birijîyo. Coka rolê pîlî kewenê milê Dêrsimî. Şorê sindoqan ser û îqtîdarî ra seba ke Dêrsim visto nê halî hesab bipersê.''