Hemwelatîyanê Binarê Qendîlî pare kerd ke 24 saetan teyarayê keşfî hasmênê Qendîlî de gêrenê û bêmabên sivîl, bax û baçxeyan ser o bombayan varnenê. Hemwelatîyan vat ke cuya înan herême de nêmenda.

Vizêr ma dewa Sûredî de bîyî ke na dewe xeylêk caran dîyaye bombayan ver. Wexto ke ma dewe de bîyî zî teyarayê keşfî dewe ser o gêrayêne. Hemwelatîyan ard ziwan ke têgêrayîşê teyarayanê keşfî hasmênê herême ra kêm nêbenê.

Hemwelatîyê bi nameyê Ehmed Ebdullahî vat: ''Bombardumananê dewleta tirke de tim zerar reseno ma ser. La heta nika Hukmatê Herême yan zî dezgehê hetkarîye ma rê ardim nêkerd. Teyarayê keşfî her roje ma ser o yê. Dewleta tirke bi bombayan 200-300 dewî kerdî wêran.''

Hemwelatîyê bînî yê bi nameyê Hesen Îbrahîmî vat: ''10 bombayî erzîyayî baxçeyê mi. Baxçe bi temamî wêran bi. Hêverî teyarayê keşfî ma ser o gêrenê dima zî teyarayê şerî bombayan erzenê. Nê pêro tesîrê cuya ma kenê.''

Hemwelatîyê bi nameyê Heci Hisênî vat: ''6-7 serran ra nata dewleta tirke herêma ma ser o bombayan varnena. Armancê aye PKK nîyo, zerardayîşê welatê ma yo. Bi desan carî bombarduman de hemwelatîyê ma bîyê qurban. 24 saetan hasmênê ma de teyarayî gêrenê û bombayan erzenê.''