Emîne Şenyaşar û Ferît Şenyaşarî vizêr roja 751. ya Nobeta Edaletî de fitarê xo verê Edlîyeya Riha de kerd. Hemsereka HDPyî Pervîne Buldan, Hemşaredarê Mêrdînî Ahmet Turk, Wekîlê HDPyî yê Riha Ayşe Surucu û Omer Ocalan û namzetanê Partîya Çep a Keske keye zîyaret kerd û bîyî meymanê sifreya fitarî ya Şenyaşaran.

Hêverî Ahmet Turkî pare kerd ke keyeyê Şenyaşarî gêreno edaletî la yeno hedefkerdene. Turkî vat: ''Ma do hesabê ney bipersê. Ganî şarê kurdî sindoqan de cewabê ney bido.''

Hemsereka HDPyî Pervîne Buldan îfade kerd ke ê dejê keyeyî zerrî ra hîs kenê. Buldane vat: ''Dayîke Emîne seba edaletî hewar kena û bermena. Ganî sûcdarî bêrê cezakerdene. Bêguman no dewranê AKP-MHPyî 14ê gulane de do biqedo. Hêsirê dayîke Emîne çiman ra bigêrê, berê serê sindoqan. Ez venga şarê Riha yê hîsgerî dana. Hukmatê AKPyî ra dima edalet qetî do bêro.''

Qiseykerdişan ra dima heyetî û keyeyê Şenyaşarî pîya fitar kerd.