Wekîlanê HDPyî serê gorê ci de Mehmet Sîncar yad kerd. Wekîlê Mêrdînî Mehmet Sîncar wexto ke şi cayê qetilkerdişê endamanê Meclîsê Partîye yê Partîya Demokrasî (DEP) Habîp Kiliç û Hîkmet Kiliçî îdarekarê Rêxistina Êlihî Metîn Ozdemîrî reyde 4ê êlula 1993yî de hêrişêkê çekdarî de amebi qetilkerdene.

Merasîmê yadkerdişî Goristanê taxa Firatî (Goristanê Şehîdan) ê qezaya Qoserî yê Mêrdînî de ame kerdene. Hemsereka HDPyî Pervîne Buldan, Hemşaredara Mêrdînî Ahmet Turk û Fîgene Altundag, Wekîla HDPyî ya Mêrdînî Pero Dundar, endamê partîye, endamê Meclîsê Mayanê Haştîye û xeylêk kesî tewrê yadkerdişî bîyî.

Yadkerdiş de verî cinîya Mehmet Sîncarî Cîhane Sîncar qisey kerd û vat: ''Mehmet Sîncar kurd bi, merdimêko rûmetên bi. Ey soz da û bedelê ci da.''

Hemserekê HDPyî yê Mêrdînî Alî Yîgîtî zî pare kerd ke ê do heta peynî wayîrê têkoşînê Sîncarî vejîyê.

Ahmet Turkî îfade kerd ke Sîncarî seba şarê xo ganê xo feda kerdo û vat: ''Dewlete seba çinkerdişê destkewteyanê kurdan hêrişan rê dewam kena. Şarê kurdî seba azadî û ameyoxê xo qetî tawiz nêda. Şarê kurdî nê bedelê pîlî qetî xo vîr a do nêkero û têkoşînê Sîncarî rê dewam bikero.''

Hemsereka Pêroyî ya HDPyî Pervîne Buldan zî merasîm de qisey kerd û vat: ''Ma zanenê ke kamî fermanê kiştişê Mehmet Sîncarî da. La hema zî dewaya kiştişî de kesêk zî nêtepişîya. Dewleta tirke 90a de senî bîye nika zî wina ya. 90an de zî bedenê merdeyanê kurdan rê îşkence ameyêne kerdene, nika zî esteyî zereyê tewre de dîyenê keyeyanê kurdan. Zulmê vera kurdan hema zî dewam keno.

Ê kenê ke kurdî milê xo çewt bikerê. Kerdişo ke embaza ma Semra Guzel rê ameyo kerdene 90an de Mehmet sancar û embazanê ey rê ame kerdene. Semra Guzel milê xo çewt nêkerd, sereyê xo nêard war. Ma reyna soz danê şarê xo, Mehmet Sîncar û embazanê xi ke wa zerrîya înan rehet biba. Ma dersê xo girewtî û ameyî na aste. Ma do qetî milê xo çewt nêkerê.''

Peynîya merasîmî de qeranfîlî ronîyayî serê gorê Sîncarî.